Охирги 15 кун ичида «Давергеодезкадастр» қўмитаси тизимидаги 34 нафар раҳбар ва ходим лавозимидан озод этилди, дея хабар берди қўмита ахборот хизмати.
Қайд этилишича, ижтимоий тармоқлар орқали «Давергеодезкадастр» қўмитаси раисига тўғридан-тўғри мурожаат қилиш имконини берувчи Telegram бот ишга туширилган бўлиб, унга келиб тушаётган мурожаатлар асосида фуқаро ва тадбиркорларнинг муаммолари ўрганилмоқда.
Таъкидланишича, мурожаатларни ўрганиш жараёнида лавозимини суиистеъмол қилиб, вазифасига масъулиятсизлик билан ёндашаётган, бу соҳада халққа хизмат қилиш эмас балки бошқа мақсадда юрган раҳбар ва ходимлар яққол билиниб қолмоқда.
Фарғона вилоятида 5 та, Наманган вилоятида 11 та, Жиззах вилоятида 1 та ҳамда Давлат кадастрлари, геодезия ва картография миллий марказининг 1 та жами — 18 нафар раҳбар ва ходим ишида кўплаб камчиликларга йўл қўйганлиги учун лавозимидан озод этилган.
Улар орасида Фарғонада бино ва иншоотларга кадастр ҳужжатларини тайёрлаб бериш эвазига 400 АҚШ доллари талаб қилган Тошлоқ туман ер ресурслари ва давлат кадастри бўлими мутахассиси, Ўзбек давлат ер тузиш-илмий лойиҳалаш институти «Ўздаверлойиҳа» Фарғона филиали муҳандиси ҳам бор.
«Коррупцион ҳолатлар қаердан ва қандай қилиб келиб чиқаётганини халқимиз, айнан сиз яхши биласиз. Шу сабабли яна бир бор сизларга мурожаат қилмоқчимиз.
Ҳурматли фуқароларимиз ҳамда тадбиркорларимиз! Агарда сиз бизнинг хизматларимиздан фойдаланишда муаммо ёки коррупцион ҳолатларга дуч келсангиз, бизга (Telegram бот @ygkuzbot, электрон почта 01@ygk.uz) хабар беринг!», – дейилади хабар сўнггида.
Изоҳ (0)