Коронавирус сабаб Россияда қолиб кетган талабалар Ўзбекистон Президенти Шавкат Мирзиёевга мурожаат йўллаб, ўзлари учун чартер рейс ташкиллаштирилиб берилишини илтимос қилди. Гап Татаристоннинг Қозон федерал университетининг 300 дан ортиқ талабалари ҳақида бормоқда.
Мурожаат Қозон федерал университети бош корпуси қаршисида ёзиб олинган. Бир неча талаба навбат билан сўзга чиқиб, Ўзбекистон Президенти ва ҳукуматидан ёрдам сўраган.
«Ассалому алайкум ҳурматли Шавкат Миромонович, Абдулла Негматович ва Абдулазиз Хафизович!
Биз Ўзбекистон фуқаролари ҳозирда Татаристоннинг Қозон шаҳридамиз. Гап шундаки, 400 дан ортиқ талаба Қозонгдан мамлакатга қайтиши керак бўлган чартер рейсга ёзилиб қўйган. Бироқ парвоз қачон амалга оширишидан бехабармиз. Сизлардан бизга ҳам худди Сибир федерал округи талабаларига кўрсатган ёрдамни беришларингизни сўраймиз. Биз бутун дунёдаги ва юртимиздаги эпидемиологик вазиятни тушуниб турибмиз. Шундай бўлса-да, сизлардан ёрдам сўраб қоламиз», — дейилади мурожаатда.
Таъкидланишича, ўқув йили тугаганлиги сабабли кўплаб талабалар бошпанасиз қолиб кетган. Ижарага хонадон олиш учун эса талабаларнинг ёнида маблағ йўқ, шунингдек, Россияда карантин режими бекор қилингани сабаб рўйхатдан ўтиш, миграция картаси ва регистрация, ётоқхонада яшаш имконияти мавжуд эмас.
Аввалроқ Томскдаги ўзбекистонлик талабалар бош вазир Абдулла Ариповга видеомурожаат йўллаб, уйларига қайтиш учун чартер рейс ташкиллаштириб беришни илтимос қилишган эди. Шундан сўнг, Президент Шавкат Мирзиёевнинг топшириғига биноан Россиянинг Новосибирск шаҳридан 200 га яқин ўзбекистонлик талаба чартер рейс орқали Тошкентга олиб келинган эди.
Эслатиб ўтамиз, 15 июль куни Европа давлатларидан 220 нафар ўзбекистонлик чартер рейс орқали Тошкентга олиб келинганди. 17 июль куни эса Республика махсус комиссиясининг қарорига мувофиқ, хориждаги ўзбекистонликларни олиб келиш учун 20 июлдан 2 августгача амалга ошириладиган навбатдаги чартер рейсларнинг жадвали тасдиқланган.
Изоҳ (0)