Qozondagi o‘zbekistonlik talabalar Shavkat Mirziyoyevga videomurojaat yo‘lladi. Avvalroq Tomskdagi talabalar shunday murojaatdan so‘ng O‘zbekistonga qaytarilgandi

Koronavirus sabab Rossiyada qolib ketgan talabalar O‘zbekiston Prezidenti Shavkat Mirziyoyevga murojaat yo‘llab, o‘zlari uchun charter reys tashkillashtirilib berilishini iltimos qildi. Gap Tataristonning Qozon federal universitetining 300 dan ortiq talabalari haqida bormoqda.

Murojaat Qozon federal universiteti bosh korpusi qarshisida yozib olingan. Bir necha talaba navbat bilan so‘zga chiqib, O‘zbekiston Prezidenti va hukumatidan yordam so‘ragan.

“Assalomu alaykum hurmatli Shavkat Miromonovich, Abdulla Negmatovich va Abdulaziz Xafizovich!

Biz O‘zbekiston fuqarolari hozirda Tataristonning Qozon shahridamiz. Gap shundaki, 400 dan ortiq talaba Qozongdan mamlakatga qaytishi kerak bo‘lgan charter reysga yozilib qo‘ygan. Biroq parvoz qachon amalga oshirishidan bexabarmiz. Sizlardan bizga ham xuddi Sibir federal okrugi talabalariga ko‘rsatgan yordamni berishlaringizni so‘raymiz. Biz butun dunyodagi va yurtimizdagi epidemiologik vaziyatni tushunib turibmiz. Shunday bo‘lsa-da, sizlardan yordam so‘rab qolamiz”, — deyiladi murojaatda.

Ta’kidlanishicha, o‘quv yili tugaganligi sababli ko‘plab talabalar boshpanasiz qolib ketgan. Ijaraga xonadon olish uchun esa talabalarning yonida mablag‘ yo‘q, shuningdek, Rossiyada karantin rejimi bekor qilingani sabab ro‘yxatdan o‘tish, migratsiya kartasi va registratsiya, yotoqxonada yashash imkoniyati mavjud emas.

Avvalroq Tomskdagi o‘zbekistonlik talabalar bosh vazir Abdulla Aripovga videomurojaat yo‘llab, uylariga qaytish uchun charter reys tashkillashtirib berishni iltimos qilishgan edi. Shundan so‘ng, Prezident Shavkat Mirziyoyevning topshirig‘iga binoan Rossiyaning Novosibirsk shahridan 200 ga yaqin o‘zbekistonlik talaba charter reys orqali Toshkentga olib kelingan edi.