Тошкентнинг бир нечта туманларида «Арбидол» ва «Эргоферон» каби препаратларни ноқонуний равишда пуллаётган шахслар қўлга олинди. Бу ҳақда «Дарё»га Бош прокуратура ахборот хизмати маълум қилган.
Бош прокуратура ҳузуридаги департаментнинг Яккасарой туман бўлими томонидан ўтказилган тезкор тадбирда фуқаро Ш. хорижда ишлаб чиқарилган ва қўлбола усулда қадоқланган «Арбидол» дори воситасининг ҳар бир қутисини 450 минг сўмдан ҳисоблаб, 40 қутисини харидорга 18 миллион сўмга сотган вақтида ашёвий далил билан ушланган.
Шу куннинг ўзида олиб борилган терговга қадар текширувда Ш.нинг мазкур дори воситасини Telegram’даги «Онп_узб» канали орқали И. ва С. исмли шахслардан қайта сотиш мақсадида ҳар бир қутисини 320 минг сўмдан ҳисоблаб, 40 қутисини 1200 АҚШ доллари ва 560 минг сўмга сотиб олгани аниқланган.
Ўтказилган тезкор тадбир давомида фуқаро И. ва С. томонидан фуқаро Ш.га хорижда ишлаб чиқарилган ва қўлбола усулда қадоқланган «Арбидол» дори воситасининг ҳар бир қутисини 320 минг сўмдан ҳисоблаб, 110 қутисини жами 35,2 миллион сўмга сотган вақтида ашёвий далил билан ушланган. Мазкур ҳолат юзасидан департаментнинг Яккасарой туман бўлими томонидан терговолди текширув ҳаракатлари ўтказилмоқда.
Шунингдек, Бош прокуратура ҳузуридаги департаментнинг Тошкент шаҳар бошқармаси томонидан ўтказилган тезкор тадбирда фуқаролар — Н.Р. ва М.А. «Арбидол» дори воситасини ҳар бир қутисини 32 АҚШ долларидан ҳисоблаб, 200 қутисини 2000 АҚШ доллари ва 44,7 миллион сўмга фуқаро М.У.га қонунга хилоф равишда сотаётган вақтида ашёвий далиллар билан ушланган. Мазкур ҳолат юзасидан Н.Р. ва М.А.га нисбатан Жиноят кодексининг 186(3)-моддаси 2-қисми «б» банди (Оғир оқибатларнинг келиб чиқишига сабаб бўладиган сифатсиз маҳсулот чиқариш ёки сотиш) билан жиноят иши қўзғатилиб, тергов ҳаракатлари ўтказилмоқда.
Шайхонтоҳур туманида Бош прокуратура ҳузуридаги департаментнинг Шайхонтоҳур туман бўлими томонидан ўтказилган тезкор тадбирда фуқаролар — А.Б., Ш.К. ва Ж.А. олдиндан тил бириктириб, 100 қути «Арбидол» дори воситасини ҳар бир қутисини 450 минг сўмдан ҳисоблаб, жами 4000 АҚШ доллари ва 5 миллион сўмга фуқаро В.Қ.га қонунга хилоф равишда сотган вақтида ашёвий далиллар билан ушланган. Мазкур ҳолат юзасидан А.Б., Ш.К. ва Ж.А.га нисбатан Жиноят кодексининг 186(3)-моддаси 2-қисми «б» банди (Оғир оқибатларнинг келиб чиқишига сабаб бўладиган сифатсиз маҳсулот чиқариш ёки сотиш) билан жиноят иши қўзғатилиб, тергов ҳаракатлари ўтказилмоқда.
Юнусобод туманида Бош прокуратура ҳузуридаги департаментнинг Тошкент шаҳар бошқармаси томонидан ўтказилган тезкор тадбирда фуқаролар — М.Р., О.Й. ва бошқалар ўзаро олдиндан тил бириктириб, 100 қути «Эргоферон» дори воситасининг ҳар бир қутисини 130 минг сўмдан ҳисоблаб, жами 13 миллион сўмга фуқаро Ш.К.га қонунга хилоф равишда сотган вақтида ашёвий далил билан ушланган. Ҳолат юзасидан М.Р., О.Й. ва бошқаларга нисбатан Жиноят кодексининг 186(3)-моддаси 2-қисми «б» банди (Оғир оқибатларнинг келиб чиқишига сабаб бўладиган сифатсиз маҳсулот чиқариш ёки сотиш) билан жиноят иши қўзғатилиб, тергов ҳаракатлари ўтказилмоқда, дейилади хабарда.
Аввал Тошкент шаҳар прокурори пойтахтдаги 1 минг 562 та дорихона раҳбари нарх-навони асоссиз оширмаслик бўйича жиддий огоҳлантирилганини айтгани, Бош прокуратура ҳузуридаги Иқтисодий жиноятларга қарши кураш департаментининг Тошкент шаҳар бошқармаси томонидан ўтказилган рейдларда ҳозирда талаб кескин ортган ва дорихоналарда топиш қийин бўлган «Эргоферон» ва «Арбидол» дориларининг ноқонуний савдоси аниқлангани ҳақида хабарлар берилган.
Ўзбекистонда коронавирус профилактикаси учун одамлар орасида «Арбидол», «Эргоферон»га бўлган талаб кескин ошган. Хусусан, «АрзонАптека» дори воситалари қидирув тизими маълумотларига кўра, сўнгги 10 кун давомида Ўзбекистонда энг кўп қидирилган вирусга қарши қўлланилувчи препаратлар рўйхатида «Арбидол», «Эргоферон» ҳам бор. 8—17 июнь кунлари қидирув хизмати орқали «Арбидол» 270, «Эргоферон» 185 марта қидирилган бўлса, 6—15 июль кунлари эса ушбу дори воситаларига талаб ошиб, «Арбидол»га 61 370 тани «Эргоферон»га 19 900 тани ташкил этган.
Журналист Барно Султонова ҳам дорихоналарда ҳамма «Арбидол», «Эргоферон», «Парацетамол» каби дориларни тўхтовсиз олаётганига гувоҳ бўлган. Вилоятларда, хусусан, Бухорода ҳам қатор дори воситалари билан бирга «Арбидол», «Эргоферон»га бўлган талаб ва эҳтиёж кескин ошган.
Мутахасисслар эса «Арбидол» дори воситасининг фойдасини нолга тенг деб баҳоламоқда. Ушбу препаратнинг фойдаси ЖССТ томонидан тасдиқланмаган ва COVID-19’га қарши фойдаланишда тавсия этилмаган. Бу дорилар Россия ва унинг атрофидаги давлатлардан ташқари ҳеч қаерда ишлатилмайди.
«Эргоферон» эса гомеопатик восита бўлиб, унда фаол моддалар шунчалик камлигидан, инсон танасига ҳеч қандай таъсир қилмайди. Яъни на фойдаси, на зарари бор. Шунчаки плацебо.
Изоҳ (0)