АОКА штабида ташкил қилинган брифингда Вазирлар Маҳкамаси ҳузуридаги Санитария эпидемиология назорати давлат инспекцияси раҳбари Нурмат Отабеков Қорақалпоғистонда икки нафар машҳур шифокорларнинг коронавирусдан вафот этгани ҳақидаги хабар нима учун яшириб келинаётгани хусусида берилган саволга жавоб қайтарди.
«Ҳа, ҳақиқатдан ҳам ўтган ҳафтада Қорақалпоғистонда икки нафар тиббиёт ходими коронавирус асоратлари оқибатида вафот этган. Уларнинг бири шифокор ва яна бири ҳамшира. Бу ҳақда ўша куннинг ўзида маҳаллий телевидение орқали хабар берилган. Биз ўзимизни инфекциядан ҳимоялаш ҳақида кўпроқ қайғуришимиз лозим. Бу каби хабарлар ҳеч кимни хурсанд қилмайди, бироқ биз ҳар бир ўлим ҳолати ҳақида рўй-рост тарзда Соғлиқни сақлаш вазирлигининг расмий сайти, АОКА расмий манбалари орқали эълон қилиб боряпмиз», — деган Нурмат Отабеков.
Соғлиқни сақлаш вазирлиги тақдим этиб бораётган статистикага кўра Қорақалпоғистонда иккита ўлим ҳолати қайд этилган. 2020 йил 8 июлда (ўтган ҳафтада эмас) Нукус шаҳрида яшовчи 56 ёшли З.Д. ўткир юрак-қон томир ва нафас етишмовчилигидан вафот этган. Бемор ҳеч кимга мурожаат қилмасдан уйида даволангани айтилганди. Бу 23 июль куни Президент фармони билан «Жасорат» медали берилган марҳум Жуманиёзова Зулфия Йўлдошевна бўлиши мумкин.
Иккинчи ўлим ҳолати 22 июлда қайд этилган ва Нукус шаҳрида яшовчи 42 ёшли Б.Д. ўткир нафас ва юрак-қон томир етишмовчилигидан вафот этган. Нурмат Отабековнинг сўзларига таянилса, мантиқий жиҳатдан Б.Д.нинг шифокор экани маълум бўлади.
Шунингдек, 22 июлда Қорақалпоғистон прокуратурасида бўлим бошлиғи лавозимида ишлаган, Ўзбекистон бош прокурорининг собиқ ўринбосари Ҳакимбай Халимов 66 ёшида коронавирус асоратларидан вафот этгани хабар қилинган. Аммо ушбу ўлим ҳолати юзасидан ССВ томонидан ахборот берилмаган. Шунингдек, «Дарё» Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабарлар берган. Бироқ вазирлик мазкур ўлим ҳолатлари юзасидан ахборот бермаяпти.
Изоҳ (0)