Ўзбекистонда фуқароларни ишга жойлаштириш бўйича хизматлар кўрсатадиган хусусий бандлик агентликлари томонидан кўрсатиладиган хизматлар нархини аниқ белгилаш режалаштирилмоқда. Бу масала Олий Мажлис Қонунчилик палатасининг навбатдаги мажлисида муҳокама қилинди.
Мажлисда Қонунчилик палатаси депутатлари соҳани ҳуқуқий жиҳатдан тартибга солишга қаратилган « ‘Хусусий бандлик агентликлари тўғрисида’ги қонунга ўзгартиш ва қўшимчалар киритиш ҳақида»ги қонун лойиҳасини иккинчи ўқишда муҳокама қилди.
Таъкидланишича, амалдаги қонунда хусусий бандлик агентликлари томонидан фуқароларга ишга жойлаштириш соҳасида кўрсатилган ахборот ва маслаҳат хизматлари учун тўланадиган ҳақ миқдорининг аниқ чегараси белгиланмаганлиги улар томонидан ушбу турдаги хизматларни кўрсатиш бўйича турли миқдордаги суммаларнинг белгиланишига сабаб бўлмоқда.Қайд этилишича, хусусий бандлик агентликлари томонидан хизматлар кўрсатиш тўғрисидаги шартномаларни рўйхатга олиш ва уларнинг бажарилишини назорат қилиш ҳамда мониторингини амалга оширишнинг шаффоф механизми мавжуд эмас. Мазкур омиллар уларнинг фаолияти тўғрисида аниқ ва ҳаққоний маълумотлар олиш ва таҳлил қилишга салбий таъсир кўрсатмоқда.
Депутатлар томонидан қайд этилишича, қонун лойиҳасида хусусий бандлик агентликлари томонидан кўрсатиладиган ахборот ва маслаҳат хизматлари учун олинадиган ҳақ миқдори аниқ қилиб белгиланмоқда. Фаолиятнинг шаффофлигини таъминлаш мақсадида хизматлар кўрсатиш тўғрисидаги шартномаларни реал вақт режимида Бандлик ва меҳнат муносабатлари вазирлигининг «Labor-migration» дастурий мажмуасида рўйхатдан ўтказиш лозимлиги кўрсатиб ўтилмоқда.
Мамлакатдан ташқарида иш қидираётган шахсларга зарур пайтда ваколатли органлар билан боғланишга доир ахборот-маълумотлар алмашиш тизимини йўлга қўйиш масаласи ҳам қонун лойиҳасида ўз аксини топмоқда. Лойиҳада Бандлик ва меҳнат муносабатлари вазирлигига хусусий бандлик агентликлари фаолиятини уларнинг молия-хўжалик фаолиятига аралашмаган ҳолда текшириш ваколати берилмоқда.
Депутатларнинг фикрича, киритилаётган ўзгаришлар иш қидираётган шахслар ва уларнинг тақдири ҳақидаги маълумотларнинг реаллашишига, алданишларнинг камайишига хизмат қилади. Шунингдек, хусусий бандлик агентликлари фаолиятининг шаффофлиги ҳам таъминланади.
Эслатиб ўтамиз, Ўзбекистонда хусусий бандлик агентликлари тўғрисидаги қонун 2018 йил октябрь ойида кучга кирган.
Хусусий бандлик агентликлари муаммоси 2019 йил декабрида Олий Мажлис Сенатида қизғин баҳс-мунозараларга сабаб бўлганди. Хусусан, сенатор Фаррух Дадахўжаев мигрантларнинг маблағларини ҳимоя қилиш механизми йўқлиги учун Бандлик ва меҳнат муносабатлари вазирлигини танқид қилиб, агентликлар билан банк ҳисоб-китобларини аккредитив асосда олиб боришни таклиф қилган эди.
Ўз навбатида, Бандлик ва меҳнат муносабатлари вазирлиги қонунга ўзбекистонликларни хорижда ишга жойлаштириш бўйича виждонсиз хизмат кўрсатилишидан ҳимоя қила оладиган тузатишларни киритиш ниятини билдирган.
Изоҳ (0)