Samarqand viloyati sog‘liqni saqlash boshqarmasi boshlig‘i Davronbek Jumaniyozovning ma’lum qilishicha, koronavirusga chalinib kasalxonaga tushgan bemorlarning yaqinlari tomonidan shifokorlarga qo‘ng‘iroq qilish holatlari juda ko‘p kuzatilmoqda va bu shifokorlarning ishiga xalaqit bermoqda.
Mutaxassisning ta’kidlashicha, uning o‘ziga ham ko‘p qo‘ng‘iroqlar bo‘ladi. Bemorlarning yaqinlari ularga yaxshi qaralmayotganidan shikoyat qiladi, qaysidir tanish shifokori ma’lum bir dorini qo‘llash zarurligini aytgani haqida gapiradi.
“Biz xalqimiz xabar olib tursin, deb telefonlarni olib kirishga ruxsat berganmiz. Lekin ba’zida telefonlar bizning ishlarimizga xalaqit bermoqda”, — dedi SSB rahbari.
Boshqarma boshlig‘ining ma’lum qilishicha, koronavirus bilan kasallanib, shifoxonaga kelgan bemor aniq belgilangan protokollar asosida davolanadi. Sog‘liqni saqlash vazirligi va Jahon sog‘liqni saqlash tashkiloti tomonidan belgilangan protokol mavjud bo‘lib, mazkur protokoldan tashqarida bo‘lgan dorilardan foydalanilmaydi.
Mavzuga doir: Samarqand viloyat SSB rahbari hozirda aniqlanayotgan koronavirus bemorlari 100 foiz aholi orasidan chiqayotganini aytdi
Qoidaga ko‘ra, kasallik aniqlanganlarning xonadoniga dastlab mobil guruhlar borib, bemorning kasalxonada yoki uyda davolanishi yuzasidan qaror qiladi. Bemor kasalxonaga yotqizilishi kerak bo‘lsa, tez tibbiy yordam jo‘natiladi. Uyda davolanish imkoniyati bo‘lmaganlarni esa to‘g‘ridan to‘g‘ri tez tibbiy yordamda kasalxonaga olib boriladi.
“Shunday bo‘lsa ham meni birinchi yotqizishing kerak, mening qarindoshimni/tanishimni birinchi yotqizishing kerak, mazmunidagi juda ko‘p qo‘ng‘iroqlar bo‘lib, ba’zan bizning ishlashimizga ham xalaqit berishmoqda”, — dedi boshqarma boshlig‘i.
Izoh (0)