Қашқадарёда коронавирусга чалинган 64 ёшли эркак ҳаётдан кўз юмди. Бу вилоятдаги учинчи ўлим ҳолати

Соғлиқни сақлаш вазирлиги Қашқадарёда 64 ёшли А.А. исмли коронавирусга чалинган эркакнинг вафот этганини хабар қилди.

Қайд этилишича, Қашқадарё вилояти Қарши шаҳрида яшаган 64 ёшли А.А.да COVID-19 тасдиқлангач, у вилоят юқумли касалликлар шифохонасига ётқизилган.

Унга COVID-19 инфекциясининг ўта оғир кечиши, икки томонлама пневмония ташхиси қўйилган. Хасталик ўткир нафас ва юрак-қон томир етишмовчилиги, сепсис, полиорган етишмовчилиги асоратлари билан кечган.

Шунингдек, бемор юрак ишемик касаллиги, ‘стабиль’ зўриқиш стенокардияси, гипертония каби ҳамроҳ касалликлар билан ҳам оғриган.

Беморга мутахассислар томонидан онлайн консультация ва консилиумлар ўтказилган, даволаш жараёни белгиланган стандартлар асосида олиб борилган.

Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак-қон томир етишмовчилигидан вафот этган, дейилади ССВ хабарида.

Бу Ўзбекистон Соғлиқни сақлаш вазирлиги ҳисоби бўйича мамлакатдаги коронавирус оқибатида 102-ўлим ҳолати. «Дарё» ҳисоби бўйича коронавирус асоратлари оқибатида вафот этганлар сони 107 нафарни ташкил этмоқда.

Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. ҳунингдек, 22 июлда Ўзбекистон бош прокурорининг собиқ ўринбосари Ҳакимбай Халимов 66 ёшида коронавирус асоратларидан вафот этгани хабар қилинган. Бироқ ушбу ҳолатлар ҳақида ССВ томонидан айни вақтгача ахборот берилмаган.