Бухоро вилоятида коронавирус билан оғриган беморларга ёрдам бериш мақсадида Dynmed компаниясининг ҳар бири 12 миллион сўм турувчи 50 дона тиббиёт контцентраторини сотиб олгани ҳақида хабар берилганди. Telegram’даги bakiroo канали Dynmed компаниясининг кислород контцентраторлари Alibaba’да 320 доллардан таклиф этилаётганини, агар 100 тадан ортиқ олинса, 220 доллардан сотилаётганини ёзиб қолдирди. «Ўзлаштириш даражасини тасаввур этяпсизми: 3-5 баробаргача. Бунақа ишлар учун нормал давлатда шу заҳотиёқ иш очилади. Буюртмачидан тортиб, ўртада турганларгача», деб ёзади канал муаллифи Отабек Бакиров.
Бухоро ҳокими ўринбосари Мирали Ҳамроев мазкур ҳолатни изоҳлар экан, давлат ҳокимияти ва бошқаруви органлари томонидан олиб борилаётган ишларга асоссиз хулоса берилаётганини қоралашини билдиради.
«Бухорода даволаш-профилактика ишларини тубдан яхшилашга эътибор кучайтирилаётган экан, демак мавжуд тиббиёт муассасаларининг моддий-техник базасини мустаҳкамлаш учун таклиф этилган арзон нархдаги тиббиёт ускуналарини харид қилишга шаймиз. Мураккаб ва синовли даврни бошимиздан кечираётган бир пайтда давлат ҳокимияти ва бошқаруви органлари томонидан олиб борилаётган ишларга асоссиз хулосалар берилишини қоралайман», — дейди Бухоро вилояти ҳокими ўринбосари Мирали Ҳамроев.
«Бухоро дори-дармон» МЧЖ масъуллари эса 320 долларга таклиф қилинаётган кислород контцентраторлари тиббиётга мослаштирилмаган бўлиши мумкинлигини айтмоқда.
«Кислород контцентратори орқали амалга оширилган бир неча кунлик даво муолажалари беморда фавқулодда ўлим хавфини кескин камайтириши ва уларда нормал уйқуни таъминлаш хусусиятига эга. Бироқ 320 долларга таклиф қилинаётган кислород контцентраторлари тиббиётга мослаштирилмаган бўлиши мумкин. Агар арзон нархдаги бу таклиф ва ташаббус тўғри бўлса, тиббиёт мутахассисларини қўллаб-қувватлаш, улар фаолияти самарадорлигини янада оширишга қаратилгани билан аҳамиятли», — дейди «Бухоро дори-дармон» МЧЖ раҳбари ўринбосари Содиқ Гадоев.
Изоҳ (0)