Дунёда ҳақиқий севгига ҳеч нарса тўсқинлик қила олмаслиги тўғрисида юзлаб китоблар ёзилган ва қўшиқлар куйланган. Скандинавиялик жуфтлик реал ҳаётда ҳам шу каби ҳолат учраб туришини исботлаб берди, деб ёзади BBC.
Александр Клерн ва Камилла Эйрюд оила қуришга қарор қилиб, тўй кунини белгилаб қўяди ва тантанали маросимга тайёргарликни бошлаб юборади. Бироқ орага коронавирус пандемияси қўшилади. Куёв Швецияда, келин эса Норвегияда яшаса, икки мамлакат ўртасидаги чегаралар ёпиқ бўлса, нима қилиш керак? Тўйни кўчиришми? Бироқ жуфтлик бошқача йўл тутди, улар том маънода трансчегаравий тўй ташкиллаштирди.
Келин ва куёв чегаранинг икки тарафида — меҳмонларнинг бир қисми Швеция, қолгани Норвегия тарафда. Келиннинг сўзларига кўра, у тўйни шу тарзда ўтказиш бўйича ҳазиллашиб таклиф билдирган. Кутилмаганда унинг дўстлари ва қариндошлари мазкур ғояни қўллаб-қувватлаган. Ўз навбатида куёв ҳам маросимга бирор меҳмон келишига умид қилмаганини тан олган. Чунки никоҳ ўқиладиган жойгача ўрмон орқали узоқ вақт юриб келиш керак бўлган. Бироқ меҳмонлар ташриф буюрган, ҳатто кутилганидан ҳам кўп — икки нафар полициячи чегара бузилмаслигини назорат қилиб турган.
«Биз оила қуришни истаган эдик. Севги барча тўсиқларни енгиб ўтади», — дейди келин. Аммо тўйдан кейин жуфтлик икки томонга тарқалишга мажбур бўлган — чегаралар ҳали очилганича йўқ.
Изоҳ (0)