АОКА ҳузуридаги штабда бўлиб ўтган брифингда Коронавирусга қарши штаб аъзоси Барно Одилова COVID-19 инфекцияси билан касалланган беморларни амбулатор шароитда аниқлаш, ташхис қўйиш, даволаш ва реабилитация қилиш жараёнини такомиллаштириш чоралари ҳақида маълум қилди.

Уларга кўра

• бирламчи тиббий-санитария ёрдами муассасалари — Тошкент шаҳридаги 74 та кўп тармоқли марказий ва оилавий полкилиника аҳолига кеча-ю кундуз фаолият юритиш тизимига ўтказилган;
• бунда тиббиёт ходимлари 12 соатлик иш режимига ўтказилган (соат 8:00 дан соат 20:00 гача ва соат 20:00 дан соат 8:00 гача).

Ҳар бир поликлиникада микроучасткалар ташкил қилиниб, уларга масъуллар бириктирилган ва уларнинг асосий вазифаси сифатида қуйидагилар белгиланган:

• хонадонларга телефон орқали қўнғироқ қилиш, ҳолидан хабар олиш;
• касалликларни эрта аниқлаш ва саралаш (амбулатор ёрдам учун, лабораторияга, шифохонага);
• аниқланган муаммоларни жойида ҳал қилиш.

Бунинг учун Тошкент шаҳар поликлиникалари 750 дона мобил телефон билан таъминланган ва ҳар бир оилавий поликлиникада тун-у кун фаолият юритадиган Call-марказ шароити яратилган.

Ҳар бир поликлиникада амбулатор даволанишга олинган беморлардан хабар олиш ва уй-шифохона шароитида даволаш учун мобил бригадалар ташкил қилинган. Мобил бригадалар томонидан беморлар учун дор-дармон етказиб берилмоқда;

Амбулатор-поликлиника тизимида фаолият юритаётган тиббий ходимлар меҳнатини рағбатлантириш мақсадида Тошкент шаҳар ҳокимлиги томонидан:

• COVID-19 касаллиги профилактикаси, диагностика ва даволашда иштирок этаётган тиббиёт ходимлари учун 6 фоизлик устама ҳақ тўлаш;
• тиббиёт ходимларини зарур ҳимоя воситалари (комбинезон, ниқоб, қўлқоп, кўзойнак), антисептик воситалар ва пирометр, тиббиёт муассасаларини зарарсизлантириш учун дезинфекция эритмалари билан таъминлаш;
• тиббиёт ходимларини жамоат транспорти ҳаракатланмаган пайтда келиб-кетиши учун автотранспорт ажратиш;
• аҳоли билан телефон орқали мулоқотни яхшилаш мақсадида ҳар бир оилавий поликлиникани 3 тадан стационар телефон ва қўшимча мобил телефонлар билан таъминлаш;
• мобил бригадалар учун қўшимча транспорт ажратиш масалалари ҳал қилиниши тайинланди.

Беморларни аниқлаш, диагностикаси, даволаш жараёнларини тартибга солиш мақсадида вазир ўринбосари бошчилигида COVID-19- амбулатор штаби ташкил қилинди, Telegram’да махсус канал ташкил қилинган. Ушбу каналга Соғлиқни сақлаш, ички ишлар, ҳокимлик ва маҳалла вакиллари (ҳар бир туман учун масъул) бирлаштирилди ва ахборот алмашинуви таъминланган.

Тиббиёт ходимлари томонидан COVID-19’га тааллуқли бўлган ҳисобот шаклларини мақбуллаштириш, соддалаштириш бўйича топшириқ берилган.

Амбулатор шароитда даволанаётган беморлар назоратини олиб бориш бўйича Соғлиқни сақлаш, ички ишлар ва маҳалланинг ҳамкорликдаги фаолият механизми ишлаб чиқилган.

Аввал Тошкентнинг Юнусобод туманидаги «Ўзэкспомарказ» павильонларида коронавирувсга чалинган беморларни жойлаштириш учун 500 кишига мўлжалланган койка-ўринлар ташкил қилингани, мазкур тақсимлаш марказига тиббиёт ходимлари ишга қабул қилиниши, шунингдек, Тошкент вилояти Зангиота тумани Ихтисослаштирилган кўп тармоқли юқумли касалликлар шифохонасига шифокор ва ҳамширалар ишга таклиф қилинаётгани ҳақида хабарлар берилган.