Соғлиқни сақлаш вазирлиги Тошкент шаҳрида коронавирусга чалинган 51 ёшли эркакнинг вафот этганини хабар қилди.
Хабарга кўра, Тошкент шаҳри Олмазор туманида яшаган 51 ёшли З.С. 17 июль куни ИИВ Марказий госпиталининг реанимация бўлимига ётқизилган ва 18 июль куни унда COVID-19 инфекцияси борлиги тасдиқланган.
Беморга COVID-19 инфекциясининг оғир кечиши, икки томонлама пневмония ташхиси қўйилган. З.С.да касаллик ўткир нафас ва юрак-қон томир етишмовчилиги асорати билан кечган.
Шунингдек, унда юрак ишемик касаллиги, қандли диабетнинг ўта оғир кечиши, иккала болдир артериялари окклюзияси, чап сон ёнбош артерияси стенози, сурункали панкреатит каби ҳамроҳ хасталиклар бўлган.
Беморга мутахассислар томонидан онлайн консультация ва консилиумлар ўтказилган, даволаш жараёни белгиланган стандартлар асосида олиб борилган.
Асосий касаллик асоратлари ҳисобига беморнинг аҳволи кескин оғирлашиб, мутахассислар томонидан тўлиқ ҳажмда, стандарт асосида ўтказилган реанимацион муолажаларга қарамасдан у ўткир нафас ва юрак-қон томир етишмовчилигидан вафот этган, дейилади хабарда.
Аввал Ўзбекистон Ички ишлар вазирлиги Йўл ҳаракати хавфсизлиги бош бошқармаси ахборот хизмати катта мутахассиси, подполковник Зойир Сайдалиев 2020 йил 21 июль куни 51 ёшида вафот этгани хабар қилинган, бироқ подполковникнинг ўлими сабабига аниқлик киритилмаган. ИИВ матбуот хизмати Зойир Сайдалиевнинг вафотига коронавирус инфекцияси сабаб бўлгани ҳозирча тасдиқланмаганини билдирганди.
12 июль куни Сергели ИИО ФМБ подполковниги, 13 ва 14 июль кунлари Тошкент шаҳар ИИББ майори ва ИИВ подполковниги коронавирус инфекцияси асоратлари оқибатида вафот этгани маълум бўлган, кейинроқ мазкур учта ўлим ҳолати Соғлиқни сақлаш вазирлиги томонидан тасдиқланганди.
Бу «Дарё» ҳисоби бўйича 21 июль соат 23:25 ҳолатига кўра Ўзбекистондаги 99-ўлим ҳолати ҳисобланади. Соғлиқни сақлаш вазирлиги тақдим этиб келаётган статистика бўйича эса мамлакатда эпидемия бошланганидан буён 95 киши вафот этган.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Бироқ ушбу ҳолатлар ҳақида ССВ томонидан айни вақтгача ахборот берилмаган.
Аввал Тошкентда коронавирусга чалинган 64 ёшли эркак, 68 ёшли М.И. исмли аёлнинг ҳамда Андижонда 42 ёшли Ғ.И. исмли эркакнинг вафот этгани ҳақида хабарлар берилганди.
Изоҳ (0)