Президент Шавкат Мирзиёевнинг топшириғига биноан Россиянинг Новосибирск шаҳридан 200 га яқин ўзбекистонлик талаба чартер рейс орқали Тошкентга олиб келинди, деб хабар беради ЎзА.
Ислом Каримов номидаги Тошкент халқаро аэропортида талабалар санитария қоидаларига кўра текширувдан ўтган. Уларнинг юклари ҳам тегишли тартибда дезинфекция қилинган.
«Томск шаҳри Сибир федерал округида таҳсил олаётган бу талабалар соғлиғини сақлаш мақсадида ўрнатилган тартибда карантинга олинади. Сўнгра оиласи бағрига қайтади», — дейилади хабарда.
Аввалроқ бир гуруҳ ўзбекистонлик талабалар бош вазир Абдулла Ариповга видеомурожаат йўллаб, уйларига қайтиш учун чартер рейс ташкиллаштириб беришни илтимос қилишган эди. Талабаларнинг таъкидлашича, уларнинг кунлик аҳволи кундан кунга ёмонлашмоқда. Ўқишни битирган талабалардан ётоқхонани тарк этиш талаб қилинмоқда.
Эслатиб ўтамиз, 15 июль куни Европа давлатларидан 220 нафар ўзбекистонлик чартер рейс орқали Тошкентга олиб келинган эди. 17 июль куни эса Республика махсус комиссиясининг қарорига мувофиқ, хориждаги ўзбекистонликларни олиб келиш учун 20 июлдан 2 августгача амалга ошириладиган навбатдаги чартер рейсларнинг жадвали тасдиқланган.
Изоҳ (0)