Адлия вазирлиги «Лицензиялаш ва рухсат бериш тартиб-таомилларини тубдан такомиллаштириш чора-тадбирлари тўғрисида»ги Президент фармони лойиҳасини жамоатчилик муҳокамасига қўйди. Унда қарийб 1000 га яқин буйруқбозлик жараёнларни соддалаштириш режалаштирилган.
Хабардор қилиш тартибини алоҳида институт сифатида жорий этиш режалаштирилмоқда
Ҳужжат лойиҳасига кўра, 2020 йил 1 декабрга қадар лицензиялаш, рухсат бериш ва ваколатли органни хабардор қилиш тартиб-таомиллардан ўтиш ва идоралараро электрон ўзаро ҳамкорлик қилиш имкониятига эга бўлган автоматлашган «Лицензия» ахборот тизими ишлаб чиқилади.
Хусусан, мактабгача таълим, ломбард, концерт-томоша, ветеринария даволаш, алкоголли маҳсулотлар билан чакана савдо қилиш каби фаолиятларини ваколатли органларни хабардор қилиш орқали бошлаш мумкин бўлади. Оммавий ахборот воситаларини рўйхатдан ўтказишни ҳам шу йўл орқали амалга ошириш режалаштирилмоқда.
Лицензияланадиган ва рухсатнома олиш талаб этиладиган фаолият йўналишлари сонини қисқартириш кўзда тутилмоқда
Фармон лойиҳасига кўра, 2021 йил 1 январидан қарийб 100 та лицензияланадиган фаолият йўналишлари ва 35 та рухсатномаларни бекор қилиш орқали ёки муқобил шаклларга ўтказиш назарда тутилмоқда. Бу тадбиркорлик субъектларининг йилига қарийб 125 миллиард сўмдан ортиқ маблағларини тежаш имконини беради.
Хусусан, инсон соғлиғига ва жамиятга зиён етказмайдиган фаолият турларини лицензиялашдан чиқариб ташлаш ҳамда хавфлилик даражаси паст бўлган фаолиятларни тартибга солишнинг муқобил усулларига ўтказиш таклиф қилинмоқда. Булар қаторига аудиторлик, баҳолаш, риэлторлик, фонограммаларни тайёрлаш, юкларни автомобиль транспортида шаҳарда, шаҳар атрофида ва шаҳарлараро ташиш фаолиятини лицензиялаш киради.
Шунингдек, хорижий ишчи кучларини жалб қилишга рухсатнома ва спорт иншооти объекти паспортини олиш, тренерлик фаолиятига олинадиган рухсатномаларни ҳам бекор қилиш ҳам кўзда тутилган.
Қайд этилишича, айрим турдаги лицензия ва рухсатномаларни бекор қилиш «тартибга солиш гилётинаси» усулини қўллаш орқали амалга оширилади.
Лицензиялаш, рухсат бериш ва хабардор қилиш жараёнлари тўлиқ электронлаштирилади
Бунинг учун 2020 йилнинг 1 декабригача «Лицензия» ахборот тизими ишлаб чиқилиб, барча лицензия, рухсатнома ва хабарномаларни ягона портал орқали ҳужжат топшириш, кўриб чиқиш ва уни бериш амалиёти йўлга қўйилади.
Ваколатли органларга мурожаат қилиш, ҳужжатларни топшириш фақат электрон тарзда амалга оширилади. Тадбиркордан ортиқча ҳужжатларни тақдим этишга чек қўйилади. Лицензия бериш учун бошқа органнинг маълумотномаси ёки бошқа ҳужжати керак бўлса, тадбиркор иштирокисиз ваколатли органнинг ўзи ягона тизим орқали олади.
Лойиҳа бўйича лицензия ва рухсатномаларни махсус қоғоз бланкаларда расмийлаштириш амалиётидан воз кечиб, QR-код қўйилган электрон ҳужжатлар тақдим этишга тўлиқ ўтилади.
Мазкур ишлар натижасида маъмурий тартиб-таомилларни амалга оширишдаги коррупцион ҳолатларнинг юзага келиши чекланади, тадбиркорларнинг Тошкент шаҳрига келиб-кетиши билан боғлиқ вақт ва молиявий харажатлари иқтисод қилинади, давлат органларининг махсус бланкаларни ишлаб чиқаришга бир йилда йўналтирадиган 13 миллиард сўмдан ортиқ маблағлари тежалади ва қарийб 3,5 миллион дона қоғоз сарфланишининг олди олинади.
Ушбу информацион тизимни ва дастурни ишлаб чиқишда Адлия вазирлиги грант маблағларни жалб қилган.
Лойиҳа билан бизнес жараёнлар ва маъмурий тартибларнинг кенг кўламли енгиллаштирилиши кўзда тутилмоқда
Ҳужжат лойиҳаси билан 115 та лицензия ва рухсат бериш хусусиятига эга ҳужжатларни олиш тартиб-таомилларини янада қисқартириш ва соддалаштиришга қаратилган чора-тадбирларни амалга ошириш белгиланмоқда ҳамда 14 турдаги фаолиятлар бўйича ҳужжатларни расмийлаштириш муддатларини қисқартириш режалаштирилган.
Хусусан, кредит бюросини очиш учун лицензия олишда камида 10 та тижорат банки билан кредит алмашинувини амалга оширишга розилигини тасдиқловчи ҳужжатни тақдим этиш талабини бекор қилиш, айрим фаолият турлари учун устав фонди миқдорига қўйиладиган минимал талабларни олиб ташлаш ҳамда туроператорлар хизматларини сертификатлаштиришни ихтиёрий этиб белгилаш таклиф этилмоқда.
Шунингдек, ваколатли органлар ташаббуси билан лицензия ва рухсатномаларни бекор қилиш фақат суд тартибида амалга ошириш таклиф этилмоқда. Лицензия бериш тўғрисидаги аризалар ўз вақтида кўриб чиқилмаса, тадбиркорлик субъектининг розилиги билан унга автоматик равишда лицензия ёки рухсатнома расмийлаштириб берилади. Бундай имконият «Лицензия» ахборот тизимида назарда тутилади.
Бундан ташқари, рухсат бериш тартиб-таомилларига доир муносабатларни тартибга солувчи қонунчиликни тизимлаштириш, кодификациялаш ва норматив юкини қисқартириш чоралари кўрилади.
Бунда 20 йил аввал қабул қилинган «Фаолиятнинг айрим турларини лицензиялаш тўғрисида»ги, шунингдек, «Тадбиркорлик фаолияти соҳасидаги рухсат бериш тартиб-таомиллари тўғрисида»ги қонунларни бирлаштириш орқали ягона қонун лойиҳаси ишлаб чиқилади.
Шунингдек, лицензия ва рухсатномаларнинг паспортлари жорий қилинади. Паспортларни ишлаб чиқиш натижасида тадбиркор катта ҳажмли низомлар билан танишиб ўтиришга зарурати қолмайди. Фаолиятни амалга ошириш учун асосий маълумот ва талаблар битта ҳужжат – паспортларда акс эттирилади.
Ушбу ҳужжат лойиҳаси муҳокамаси 30 июлгача давом этади.
Изоҳ (0)