Нукус шаҳрида яшовчи 42 ёшли Б.Д.да (эркак) 3 июль куни коронавирус инфекцияси тасдиқланган ва Қорақалпоғистон юқумли касалликлар шифохонасига ётқизилган. Ўзбекистон Соғлиқни сақлаш вазирлигидан маълум қилишларича, унга COVID-19 инфекцияси ўта оғир кечиши, икки томонлама пневмония ташхиси қўйилган.
Хасталик ўткир нафас етишмовчилиги, ўткир респиратор дистресс синдроми, ўткир юрак қон-томир етишмовчилиги, полиорган етишмовчилиги, семизлик 2-даражаси асоратлари билан кечган.
«Бироқ шифокорлар томонидан ўтказилган муолажаларга қарамай, беморнинг аҳволи кескин оғирлашиб, ўткир нафас ва юрак қон-томир етишмовчилигидан вафот этган», — дейилади ССВ ахборотида. Вазирлик ахборотида бемор айнан қачон вафот этганига аниқлик киритилмаган.
Бу Соғлиқни сақлаш вазирлиги томонидан эълон қилинган 96-ўлим ҳолатидир. «Дарё» ҳисоб-китобига кўра, вафот этганлар сони 100 нафарга етди.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Бироқ ушбу ҳолатлар ҳақида ССВ томонидан айни вақтгача ахборот берилмаган.
Изоҳ (0)