Қашқадарё вилоятининг Қарши шаҳри марказида 69 та оила «Шодлик» маҳалласида жойлашган харобага айланган ётоқхонада истиқомат қилади. «Дарё»га мурожаат қилган аҳолининг айтишича, улар карантин пайтида шу харобасидан ҳам ажралиб қолиши мумкин.
«Мамлакатимизда карантин эълон қилинган бўлишига қарамасдан, шу пайтда яшаб турган ётоқхонамиздан чиқиб кетишимизни талаб қилишмоқда. Биз эса қаерга боришни билмай, бошимиз қотган. Вилоят ҳокимлигига борсак, шаҳар ҳокимлигига боришимизни айтишади. Шаҳар ҳокимлигига борсак, бизни эшитишмаяпти», — дейди ётоқхонада яшовчи Нодира Давлатова.
Мазкур ётоқхонада яшовчи Насиба Жалилова ҳамда Наргиза Намозоваларнинг айтишича, бу талаб Ўзбекистонда кучайтирилган карантин бошланган кундан бери давом этиб келмоқда.
«Карантинда ҳам тинч қўйишмаяпти, ётоқхонани сотиб олишганини, бизга эса чиқиб кетишимиз лозимлигини айтишади. Карантин пайтида қаерга ҳам борамиз?», — дейди Наргиза Намозова.
Ушбу ётоқхонада тўққиз йилдан бери яшаб келаётган Насиба Жалилованинг маълумот беришича, мазкур ётоқхона яшовчиларнинг аксарияти ишсиз. Шу боисдан ҳам уларни яшаб турган жойидан ажратиш, кўпчиликнинг кўчада қолишига сабаб бўлади.
«Пенсиям арзимаган пул, камлиги боис ҳатто яшашимга ҳам етмайди. Бу ердан чиқариб юборишса, кекса ҳолимга қаерга бораман ва кимнинг уйидан бошпана топаман», — дейди Насиба Жалилова.
«Дарё» мухбири билан суҳбатлашган аҳолининг айтишича, вилоят раҳбари Зоир Мирзаев ҳокимликка тайинлангач, ушбу ётоқхонада бўлган ва хонадон вакиллари билан мулоқот қилган.
«2019 йилнинг ноябрь ойлари эди. Вилоят ҳокими Зоир Мирзаев ва шаҳар ҳокими Нормўмин Холбоев ётоқхонамизга келиб яшаш шароитимизни кўздан кечирди. Қишки мавсум учун ётоқхона деразалари ва эшикларига целлофан қоқиб, қишки мавсумга тайёрлаш лозимлигини айтди. Ва бу ерда яшовчилар учун муносиб шарт-шароит яратилишини билдирди», — дейди аҳоли вакиллари.
Мурожаатчилар ётоқхонага вилоят раҳбарининг келиши уларга катта умид бағишлаганини айтмоқда.
«Вилоят раҳбари келиб-кетгач, шароитимиз яхшиланади, ётоқхонадан чиқиб кетинг, деган дашномдан қутуламиз деб ўйлагандик. Аммо берилган топшириққа қарамасдан, шаҳар ҳокими бизнинг муаммомизга эътибор ҳам қаратмаяпти», — дейди ётоқхона аҳолиси.
Маълум бўлишича, шаҳарнинг 4-кичик туманида жойлашган 2-сонли ётоқхонада 85 та хона мавжуд бўлиб, шундан 69 тасида 144 нафар аҳоли истиқомат қилади. Ётоқхона 2019 йил май ойида беш нафар тадбиркор томонидан сотиб олинган.
«Ушбу ётоқхона 2005 йил фуқаро Озод Умиров раҳбарлигидаги кўкаламзорлаштириш билан шуғулланувчи ташкилот балансига хусусий мулк сифатида ўтказилган. Озод Умиров эса 2019 йил май ойида бинони бизга сотди», — дейди ётоқхонани сотиб олган тадбиркорлар вакили Анвар Жовлиев.
Таъкидланишича, ётоқхонани сотиб олган тадбиркорлар уни таъмирлаб, хусусий мактаб ва боғчага айлантиришни мақсад қилган.
«Вилоят раҳбари ушбу ётоқхонани кўздан кечиргач, биз сотиб олганимизни, келажакда хусусий мактаб ва боғча қуриш ниятимиз борлигини эшитди ва қўллаб-қувватлади, — дейди Анвар Жовлиев. — Шундан сўнг биз шаҳар ҳокими Нормўмин Холбоевга мурожаат қилиб, қурилишимиз кечикиб кетаётганини, ётоқхонани бўшатиб беришлари лозимлигини айтдик. Шаҳар ҳокими эса 2020 йил 1 мартга қадар кутиб туришимизни илтимос қилди. Аммо 2020 йилнинг июль ойи келдики, ётоқхона ҳалигача бўшатилмади.
«Ётоқхона хусусий мулк сифатида сотилганини тўғри тушунамиз, аммо биз ҳам кўчада қолмаслигимиз керак-ку. Шаҳар ҳокимлиги бизга ҳам кўмак бериб, имконият яратишини сўраяпмиз», — дейди аҳоли вакилларидан бири Наргиза Намозова.
«Бизга ҳам иш беришса, уй олишимиз учун имтиёз яратишса, қолганини эплаймиз, — дейди мазкур ётоқхонада яшовчи Феруза Рўзиева. — 11 йилдан бери шу ерда яшаймиз. Шунча пайт шу ерда яшаб, энди уйсиз, жойсиз қолиш жудаям алам қилади. Энг ёмони турмуш ўртоғим ҳам йўқ. Ёлғиз онаман. Алимент пулига рўзғор тебратаман. Энди карантин пайти уйдан чиқариб юборишга ҳаракат қилиниши, бизни қийин аҳволга солиб қўймоқда».
«Бир нафар фарзандимни отасиз катта қиляпман, кафе ва ошхоналарда ишлаб пул топардим. Карантин пайтида иш ҳам бўлмаяпти. Энди эса яшаб турган жойимиздан ҳам чиқаришга уринишяпти, — дейди Гули Қаҳрамонова. — Шаҳар ҳокимлигига мурожаат қилиб, 15 йилдан бери шу ерда яшаб келаётганимни, иш ва уй олишимиз учун имконият беришларини сўрадим. Ҳоким ўринбосари Алишер Насимов қўпол муносабатда бўлиб, бизни одам ўрнида ҳам кўрмади. Умуман ёрдам беришни исташмаяпти».
Ётоқхонада яшовчи ва кўз бўйича биринчи гуруҳ ногирони Мамасолиҳ Раимовнинг айтишича, унинг шаҳар ҳокимлигига қилинган мурожаатлари жавобсиз қолмоқда.
«Ҳокимликка мурожаат қилиб, биринчи гуруҳ ногирони эканлигимни, ёрдам беришларини сўрадим. Аммо ҳеч қандай натижа йўқ», — Мамасолиҳ Раимов.
Қарши шаҳар ҳокимлиги ахборот хизматининг «Дарё»га маълум қилишича, карантин пайтида ётоқхонада яшовчиларни ҳеч ким безовта қилмайди.
«Шаҳар ҳокими топшириғи билан ётоқхонада яшовчилар муаммоси ўрганиб чиқилмоқда. Ҳокимлик имкон қадар аҳолини қўллаб-қувватлаб, уларга ёрдам беришни мақсад қилган. Ваъда бериб айтамизки, карантин пайтида аҳолини ҳеч ким ҳеч қаерга чиқармайди», — дейди шаҳар ҳокимлиги ахборот хизмати раҳбари Умид Жабборов.
«Дарё» воқеалар ривожини кузатишда давом этади ва муаммо якуни хусусида маълумот беради.
Изоҳ (0)