Самарқанд вилояти аҳолисига мурожаат билан чиққан ҳоким Эркинжон Турдимов коронавирусга қарши курашилаётган оғир вазиятда 99 фоиз шифокорлар ўз вазифасини аъло даражада, сидқидилдан бажараётганини таъкидлади.
«Ҳамма ‘шифокор уйимизга келсин’, дейди. Шифокор уйга бормайди. Агар инфекция билан касалланган одамнинг уйига шифокорлар борадиган бўлса, биз шифокорларни йўқотиб қўямиз. Шунинг учун иситмаси кўтарилган, COVID-19’ белгилари бўлган беморларни кўриш учун шифокор бормайди, — деди вилоят ҳокими Эркинжон Турдимов. — Агар биз ҳамма телефонда бўладиган мурожаатларга уларни юборадиган бўлсак, эртага нима бўлади, шифокорлар касал бўлади. Биз шифокорларни асрашимиз, уларга эътиборимизни кучайтиришимиз керак», — деди вилоят ҳокими.
Эркинжон Турдимовнинг айтишича, вилоятда тор соҳадаги мутахассислар етарли эмас.
«Шифокорларни ёмон дейиш осон. 14 кун бир ‘смена’да махсус кийим кийиб, касалларнинг орасида юришнинг ўзи бўладими? Ўзингиз уйингизда врачлар кийимини бир соат кийиб, юриб кўринг, ундан кейин баҳо беринг, — деди Эркинжон Турдимов. — Яхшини ҳам ёмон деб бездириб қўйишимиз мумкин. Лекин ёмонни ҳам яхшилаб ишлатишимиз мумкин. Уйда ўтириб баҳо бериш жуда осон. Шунинг учун мен тиббиёт ходимларига ташаккур изҳор қилмоқчиман. Бугун биз коронавирусга қарши уруш қиляпмиз. Бу жангнинг олдида тиббиёт ходимлари турибди. Бир кунда тез ёрдамга 1700-2000 та қўнғироқ бўлади. Оддийгина битта шифокор беш маротаба чақириққа бориб келди дейлик, 400 нафар шифокорни қаердан топамиз. Улар кўчама-кўча юрадиган бўлса, касалларни ким даволайди?».
Эркинжон Турдимовнинг маълум қилишича, ҳозирги кунда Самарқанд вилоятида 291 нафар анестезиолог-реаниматолог, 115 нафар инфекционист, 165 нафар врач-лобарант, 17 нафар врач-эпидимолог фаолият юритмоқда. Вилоят соғлиқни сақлаш тизимида фаолият кўрсатаётган тиббиёт ходимларини Самарқанд тиббиёт институти профессор-ўқитувчилари ёрдами билан онлайн шаклда 144 соатлик ўқитиш ташкил қилинган. Шунингдек, COVID-19’га чалинган ва шифохоналарда даволанаётган беморларга тор мутахассислар томонидан доимий равишда онлайн маслаҳат йўлга қўйилган.
«Институт профессор-ўқитувчилари томонидан COVID-19 касаллигига чалинганда уйда даволаниши мумкин бўлган беморлар учун касалликдан амбулатор шаклда даволаниш юзасидан мухсус қўлланмалар тайёрланган ва вилоят аҳолисига тарқатилган», — деди Турдимов.