«Вафот этганларнинг 80 фоизи Тошкент шаҳрига тўғри келмоқда» — Шавкат Мирзиёев Тошкентдаги коронавирус билан боғлиқ вазият ҳақида

Президент Шавкат Мирзиёев 20 июль, душанба куни Тошкент шаҳри ва вилоятида коронавирус пандемияси билан боғлиқ вазият таҳлилига бағишланган видеоселектор йиғилиши ўтказди.

Давлат раҳбарининг таъкидлашича, Тошкент шаҳри ва вилоятида коронавирус билан боғлиқ вазиятни барқарорлаштириш учун чоралар кўрилаётганига қарамасдан, касалланганлар ва вафот этганлар сони кўпайиб кетмоқда.

«Вафот этганларнинг 80 фоизи Тошкент шаҳрига тўғри келмоқда. Ҳозир иложи борича энг оғир ётганларга мутахассисларни қўйиб, уларни даволаш керак», — деди Президент.

Шавкат Мирзиёевнинг қайд этишича, энг муҳим масалалардан бири касалликнинг белгиларсиз шакли билан касалланиб, уйда даволанаётганлар учун янги тизим яратиш ҳисобланади.

Президентнинг айтишича, уй шароитида даволанаётганлар ёлғиз қолмаслиги керак, бемордаги қўрқувни енгиш учун мазкур беморлар билан мулоқот қилиб туриш зарур. Бунинг учун туман поликлиникалари шифокорлари телефон орқали беморлар билан боғланиб туриши лозим.

«Кўчага чиқиш ман этилади. Ҳамма нарсани олиб келиб берамиз, мана шу нарсани ташкил қилишимиз керак. Агар у кўчага чиқса, бошқа кишиларнинг зарарланиш эҳтимоли 200 фоиз», — деди давлат раҳбари.

Шунингдек, Президент ҳозирги шароитда туманлардаги тўртта сектор раҳбарларига кўп нарса боғлиқлигини таъкидлаб ўтди.

Соғлиқни сақлаш вазирлиги томонидан 20 июль соат 23:30 ҳолатига берилган маълумотга кўра, Ўзбекистон бўйича вафот этганлар сони 91 нафарни ташкил этмоқда. Ушбу ҳолатларнинг 53 таси ёки 58 фоизи Тошкент шаҳрига тўғри келади.

Вазирлик 20 июль куни Тошкент шаҳрида олмазорлик аёл, юнусободлик, учтепалик ва мирободлик эркакларнинг вафот этгани ҳақида хабар берди.

Бундан ташқари, «Дарё» ҳисоб-китобига киритилган ДХА ходими, Маданият вазирлиги ходими ва Олмалиқ шаҳридаги икки кишининг ўлими ҳозирча ССВ томонидан расман тасдиқланмаган.