Ўзбекистон Президенти Шавкат Мирзиёев раислигида 20 июль, душанба куни ҳудудларда коронавирус инфекцияси тарқалишини камайтириш ҳамда иқтисодиёт барқарорлигини таъминлаш масалалари бўйича видеоселектор йиғилиши ўтказилди. Бу ҳақда Президент матбуот хизмати хабар берди.
Видеоселектор йиғилишида барча ҳудудлардаги аҳвол, долзарб чора-тадбирлар муҳокама этилди.
Қорақалпоғистон Вазирлар Кенгаши раиси ва вилоят ҳокимлари касаллик кўрсаткичлари, даволанаётганлар сони ва бу борада яратилган захира ўринлари бўйича ҳисобот берди. Аҳоли мурожаатлари, шошилинч тиббий ёрдам машиналари, дори-дармон таъминоти бўйича ҳолат таҳлил қилинди.
Йиғилишда жойлардаги муаммолар очиқ муҳокама қилинди. Коронавирусга қарши курашиш учун қайси ҳудудга қандай техника ва воситалар кераклиги белгиланди.
Президент мутасаддиларга вазиятнинг ҳақиқий ҳолатини реал вақт режимида назорат қилиб, юзага келаётган муаммоларни тезкор ҳал этиб бориш бўйича қатъий топшириқ берди.
Даволаш ишларини сифатли ва хавфсиз ташкил этиш, шу билан бирга, аҳоли ва объектларни дезинфекция воситалари билан таъминлаб, касаллик юқишининг олдини олиш муҳимлиги таъкидланди.
Ҳар бир ҳудуд эҳтиёжидан келиб чиқиб, етарлича дори-дармон, тиббий буюмлар ва тест тизимлари билан таъминлаш, тиббиёт ходимларини моддий рағбатлантириш манбалари белгиланди.
Йиғилишда соғлиқни сақлаш соҳаси мутасаддилари ва ҳудудлар раҳбарлари ҳисобот берди.
Шунингдек, видеоселекторда ҳудудлар раҳбарлари пандемия шароитида иқтисодитётни барқарор ривожлантириш, инвестиция жалб қилиш ва экспорт ҳажмини ошириш борасидаги 6 ойлик якунлари бўйича ҳам ҳисобот берди.
Кескин суръатларда давом этаётган пандемиянинг иқтисодиётга кўрсатаётган таъсирини аввалдан баҳолаш ва мамлакат макроиқтисодий барқарорлигини таъминлаш, инвестицион лойиҳаларни ўз вақтида амалга ошириш, қишлоқ хўжалиги, саноат ва қурилиш соҳасидаги прогнозларни бажариш, экспортни кўпайтириш, ҳудудларни комплекс ривожлантириш, тадбиркорликни қўллаб-қувватлаш бўйича кўрилаётган чора-тадбирлар натижалари таҳлил қилинди.
Давлат раҳбари ҳар бир ҳудуддаги корхоналарда пул тушумлари камайганини қайд этиб, 2020 йил 1 октябрга қадар тижорат банклари билан бирга қурилиш ва саноат корхоналарининг аксар қисмини, йил якунигача эса 100 фоиз корхоналарнинг фаолиятини тиклаш бўйича топшириқ берди.
Қишлоқ хўжалиги соҳасида ҳам қатор ҳудудларда иқтисодий прогнозлар бажарилмаганини кўриш мумкин. Хусусан, Қорақалпоғистонда қишлоқ хўжалиги ялпи маҳсулоти қиймати прогнозга нисбатан 59 миллиард сўмга кам бўлган. Бу кўрсаткич Қашқадарё вилоятида 177 миллиард, Сирдарё вилоятида 173 миллиард, Тошкент вилоятида 129 миллиард сўмни ташкил қилади.
Шавкат Мирзиёев ҳар бир ҳудудда такрорий экин майдонлари ҳисобига сабзавот ва полиз маҳсулотларини ишлаб чиқаришдаги қолоқликларни қоплаш, аҳоли хонадонларига парранда тарқатиш ишларини жадаллаштириш ҳамда чорвачилик, балиқчилик соҳасида интенсив технологияларни кенг қўллаш ҳамда йил якунига қадар ҳудудлар салоҳиятини инобатга олган ҳолда қишлоқ хўжалиги маҳсулотларини ишлаб чиқаришни 3-4 фоизга ошириш бўйича кўрсатмалар берди.
Эслатиб ўтамиз, Президент Шавкат Мирзиёев 20 июль куни эрта тонгдан Ўзбекистонда коронавирус инфекциясига қарши кураш борасида олиб борилаётган ишларнинг чуқур танқидий таҳлилига бағишланган видеоселектор йиғилиши ўтказди. Унда Тошкент шаҳри ва вилоятида пандемия билан боғлиқ ҳолат ҳамда уни барқарорлаштириш бўйича чора-тадбирлар кўриб чиқилган.
Шавкат Мирзиёев мазкур йиғилишда Ўзбекистонда ҳозир коронавирусга қарши курашдан муҳимроқ харажатлар бўлиши мумкин эмаслигини айтди. Шунингдек, давлат раҳбари талабалар ётоқхоналари ва ёпиқ спорт майдонларини коронавирусга чалинган беморларни жойлаштириш учун мослаштириш, кислород концентраторларини Ўзбекистонга олиб келиш учун махсус самолёт ажратиш ҳақида кўрсатма берди.
Маълумот учун, Қорақалпоғистон Республикаси Вазирлар Кенгаши раиси Муса Ерниязов коронавирусга чалинган, у Нукус шаҳридаги клиникада даволанмоқда. Муса Ерниязов коронавирусдан даволанаётгани ҳақидаги дастлабки гап-сўзлар июль ойи бошида пайдо бўлган, бироқ коронавирусга қарши кураш бўйича Нукусдаги штаб, Қорақалпоғистон Соғлиқни сақлаш вазирлиги ва Жўқорғи Кенгеси июль ойининг бошида ушбу хабарларни инкор этган. Ўзбекистон соғлиқни сақлаш вазири Алишер Шодмонов 18 июль куни Қорақалпоғистонга ташриф буюрган ҳамда хорижлик ва маҳаллий мутахассислар ва олимлар иштирокида Муса Ерниязовнинг аҳволи таҳлил қилинган.
Шунингдек, Сурхондарё вилояти ҳокими Тўра Боболов ҳам коронавирус билан касалланган, вилоят раҳбари Тошкент шаҳрида даволанмоқда. Қайд этиш керакки, Сурхондарё ҳокимининг коронавирусга чалингани ҳам бир неча кун яширилган.
Изоҳ (0)