Tojikiston–O‘zbekiston chegarasida tojikistonlik chegarachilarga hujum qilgan noma’lum jangarilar guruhi Afg‘onistondan kelgan IShID terrorchilari bo‘lgani aniqlandi, deb xabar berdi “RIA Novosti”.

Foto: Thrussophile

Ular Tojikistonga 3-noyabrda Kubodiyon qishlog‘idagi “Shortuz” chegara otryadi hududidan kirib kelgan va mamlakatda teraktlar o‘tkazishni maqsad qilgan.

Avval 20 nafar qurollangan va yuziga niqob taqqan jangarilar Dushanbedan 60 kilometr uzoqlikdagi “Ishqobod” postining “Sultonobod” harbiy otryadiga hujum qilgani, to‘qnashuv natijasida noma’lum shaxslar chegarchilarning 5 ta avtomatini egallab olgani, xavfsizlik xodimlari o‘tkazgan tezkor maxsus harbiy operatsiya davomida qurollangan jinoiy guruhning 15 nafar a’zosi o‘ldirilgani va 5 nafar jangari qo‘lga olingani xabar qilingan. Tojikiston tomondan bir nafar askar va militsiya xodimi halok bo‘lgani ma’lum bo‘lgandi.

Voqea sodir bo‘lgan joyda tezkor tergov guruhi surishtiruv ishlarini olib bormoqda. “RIA Novosti” xabariga ko‘ra, O‘zbekiston rasmiylari ham vaziyat o‘rganilayotganligini ma’lum qilgan.

Tojikiston va O‘zbekiston chegara hududining uzunligi 1,33 ming kilometrni tashkil etadi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.