«Пандемия даврида 27 минг нафар ишсизга 20 миллиард сўмга яқин нафақа тўлаб берилди» – Бандлик ва меҳнат муносабатлари вазири ўринбосари

Бугунги пандемия вақтида Ўзбекистондаги 493 минг нафар фуқаро ўз иш ўрнига эга бўлди. Шу жумладан, «темир дафтар»га тушган камбағал оилаларнинг 96 минг аъзоси ҳам иш билан таъминланди. Бу ҳақда 20 июль куни бўлиб ўтган Халқаро пресс клубнинг навбатдаги сессиясида маълум қилинди.

«Дарё» мухбирининг хабар қилишича, тадбирда қатнашган Бандлик ва меҳнат муносабатлари вазирининг биринчи ўринбосари Эркин Муҳитдинов ишсиз аҳоли бандлигини таъминлаш борасида амалга оширилаётган саъй-ҳаракатларга тўхталиб ўтди.

«Коронавирус пандемияси даврида ишсиз фуқаролар, камбағал оилаларнинг ишга муҳтож бўлган ишсиз аъзолари, меҳнат миграциясидан қайтган шахсларнинг бандлигини таъминлаш бўйича ўндан ортиқ инструментлар киритганмиз. Улар жуда оддий, халқимизга тушунарли ва самарали. Мана шу инструментлар орқали пандемия вақтида 493 минг фуқаронинг бандлигини таъминладик. Шу жумладан, ‘темир дафтар’га кирган камбағал оилаларнинг 96 минг нафар аъзосини ишга жойладик.

Биз, асосан, бешта: ўзини банд қилишга ёрдамлашиш, тадбиркорликка кўмаклашиш, иш берувчиларга ишсиз фуқароларни ишга олишга рағбатлантириш, вақтинчалик бандликни таъминлаш ва ишсизларни ижтимоий ҳимоя қилиш йўналишларида иш олиб боряпмиз.

Айтиш мумкинки, бошқа давлатлар ишсиз фуқароларга пул тарқатиб бериш йўлидан борди. Буни вертолёт пул дейишди, бошқа дейишди. Аммо бу кўп мамлакатда ўзини оқламади. Чунки ишсиз одам ўзининг психологик нуқтаи назаридан ишсиз бўлиб қолаверади. Пул келади, аммо у яна тушкунлик ҳолатида қолаверади.

Биз бу борада бошқача йўл тутдик. Халқимизнинг меҳнатсеварлиги, меҳнатга бўлган муносабатини билиб, уларнинг бандлигини таъминлаш учун инструмент яратяпмиз ҳамда шу орқали уларга моддий ёрдам беряпмиз.

Лекин ишсизларни вақтида иш билан таъминлай олмасак, уларга ишсизлик нафақаси ҳам тайинланяпти. Ҳозир бу осонлаштирилган енгил тартибда тўланмоқда. Шу кунгача 27 минг нафар ишсизга 20 миллиард сўм атрофида нафақа тўлаб берилди. Бу ишларни албатта, яна давом эттирамиз.

Биз республикамиздаги барча туман ва шаҳар секторларидан инструментга нисбатан эҳтиёжини аниқ ҳисоб-китоб қиляпмиз. Уларни жамлаб, яна молиявий ёрдам керак бўлса, ҳукуматимизга мурожаат этамиз», — деди вазир ўринбосари.