Президент Шавкат Мирзиёев 20 июль куни коронавирус пандемиясининг салбий таъсирини камайтириш учун аҳоли, умумий овқатланиш, савдо ва хизмат кўрсатиш соҳасидаги тадбиркорлик субъектларини қўллаб-қувватлаш бўйича қўшимча чора-тадбирлар тўғрисидаги фармонни имзолади. Бу ҳақда Молия вазирлиги хабар беради.
Эълон қилинган имтиёзлар ва преференсиялардан ташқари, ҳужжат билан 2021 йил 1 июлга қадар умумий овқатланиш корхоналари карантин чекловларининг бекор қилинишига қараб Вазирлар Маҳкамаси томонидан ўрнатилган жойлаштириш, ободонлаштириш ва фойдаланиш бўйича вақтинчалик талабларга риоя қилган ҳолда туман, шаҳар ҳокимликларини хабардор қилиш асосида истеъмолчиларга овқатланиш хизматларини кўрсатиш учун ўзларига туташ ҳудудларда енгил конструкцияларни бепул жойлаштириш ҳуқуқи берилади.
Шунингдек, 2021 йил 1 июлга қадар карантин чекловларининг бекор қилинишига қараб тадбиркорлик субъектларига маҳаллий ижро ҳокимияти органлари билан шартнома тузмасдан, солиқ органларини хабардор қилиш орқали автодўкон, автодўкон, автотиркама, автоцистерна ва фудтраклар орқали савдо қилиш ҳуқуқи берилади.
Давлат солиқ қўмитасига ўзининг расмий сайти ва мобил иловалар орқали кўчма савдони бошлаш тўғрисида электрон хабарномаларни бепул қабул қилишни таъминлаш вазифаси юкланган.
2021 йил 1 январга қадар Вазирлар Маҳкамаси халқаро тажрибадан келиб чиқиб, умумий овқатланиш корхоналарининг мавсумий кафелари ишлаши, шунингдек, кўчма савдони амалга ошириш тартибини кўриб чиқади.
Аввалроқ Pie Republic ва «Пастернак» ҳамасосчиси Лазиз Ғуломов Мирзо Улуғбек тумани ҳокимлиги тегишли идора вакиллари билан тадбиркорларни Тошкентнинг Шаҳрисабз кўчасидаги ёзги террасаларни бузишга мажбур этаётганини маълум қилганди. Гап Giotto, Teppanyaki, Pie Republic, Sultan Saray va Belle Maman каби муассасалар ҳақида кетмоқда.
Тадбиркор рухсат олишда шаффоф механизмнинг йўқлиги сабаб ёзги террасалар ноқонуний деб топилаётганини маълум қилган.
Изоҳ (0)