Кенг кўламли тадқиқотлар оқсил манбасининг танлови инсон соғлиғи ва унинг узоқ умр кўришига таъсир кўрсатишини исботлади. Тегишли тадқиқот натижалари JAMA Internal Madicine журналида чоп этилди.
АҚШ Саратон касалликлари миллий институти олимлари 16 йиллик тадқиқот натижаларини маълум қилди. Бу давр мобайнида 50 ёшдан 71 ёшгача бўлган 416 104 киши тадқиқотда иштирок этган.
1995 йилдан 2011 йилга қадар 179 068 нафар аёл ва 237 036 нафар эркак кунлик рациони тўғрисида олимларга маълумот бериб келган. Таъкидланишича, респондентлар нафақат йирик шаҳарларда, балки чекка ҳудудларда ҳам истиқомат қилган.
Тадқиқот натижасидан маълум бўлишича, ҳайвон оқсилини кўпроқ истеъмол қиладиган респондентлар орасида ўсимлик оқсилини истеъмол қиладиганларга нисбатан ўлим даражаси 5 фоизга юқори чиққан.
Ўсимлик маҳсулотларини маъқул кўрган юрак-қон томир касалликларида муаммоси бор инсонлар орасида ўлим ҳолати 11-12 фоизга камайган.
Аввалроқ олимлар қизил гўштни соғлиққа фойдали деб топгани тўғрисида хабар берилганди.
Мавзуга доир: Гўшт ва жигарни истеъмол қилишда жиддий хавф аниқланди
Изоҳ (0)