Буюк Британия Pfizer Inc, BioNTech ҳамда Франциянинг Valneva компаниялари билан ҳозирда синов жараёнида бўлган коронавирусга қарши вакциналарни 90 миллион дозада сотиб олиш бўйча шартнома имзолади. Бу ҳақда Reuters нашри хабар берди.
Агар бу компанияларнинг вакциналари синовларда муваффақиятли ўтса, Британия яна 40 миллион дозада сотиб олишни режалаштирган.
Ҳозирча дунёда коронавирусга қарши таъсир кўрсатадиган бирорта вакцина яратилмаган бўлса-да, Британияда 3 хил вакцинани буюртма қилиш мумкин ва умумий ҳисобда 230 миллион эҳтимолий доза мавжуд. Аввал Британия ҳукумати AstraZeneca компаниясининг Оксфорд университети билан ҳамкорликда яратилаётган вакцинасини 100 миллион дозада сотиб олишга келишганди.
«Дунёдаги энг машҳур фармацевтика маҳсулоти ва вакцина ишлаб чиқарувчи компаниялар билан ҳамкорлик қилиш Британиянинг хавф остида қолган аҳолисини ҳимоя қилишни кафолатлайди», – дейди Британия бизнес вазири Алок Шарма.
Шартномалар қиймати очиқланмаган. Pfizer Inc ва BioNTech компаниялари ҳозирда вакциналар синовининг дастлабки ва ўрта босқичида. Агар бу компанияларнинг вакцинаси самара берса, улар шу йилнинг охиригача 100 миллион доза, 2021 йилнинг сўнгигача эса 1,2 миллиард дозада вакцина ишлаб чиқаришни мақсад қилишмоқда.
Франциянинг Valneva компанияси эса ўз вакцинасини ҳали клиник синовлардан ўтказганича йўқ. Ушбу компания 2020 йилнинг якунига қадар вакцинанинг клиник синовларини бошламоқчи.
Аввалроқ АҚШда жойлашган Moderna компанияси вакцина синовининг дастлабки синовлари муваффақиятли ўтганини айтиб, навбатдаги синовларни 30 минг кишида олиб боришини маълум қилганди.
Изоҳ (0)