AQSh davlat departamenti Checheniston yetakchisi Ramzan Qodirovni sanksiyalar ro‘yxatiga kiritdi. Bu haqda idoraning rasmiy saytida xabar berilgan.
Xabarda aytilishicha, Qodirov hududga rahbar sifatida inson huquqlariga oid ko‘plab xalqaro me’yorlarning buzilishiga shaxsan javobgar, xususan, noqonuniy qamoqqa olish, odamlarni qiynash, hibsda ushlab turish kabi harakatlarning amalga oshirilishida bevosita ishtirok etgan.
Shuningdek, davlat departamenti Qodirovning koronavirus pandemiyasidan Chechenistonda ozodlikni cheklash bo‘yicha yangi noqonuniy o‘zgarishlar qilishda foydalanganini qayd etgan.
Qodirovning o‘zi mazkur yangi sanksiyalarga javoban Telegram’dagi kanaliga qurol-yarog‘lar saqlanadigan xonada avtomat ushlab tushgan suratini joylashtirgan va uning ostiga “Pompeo biz jangga rozimiz. Buyog‘i yanada qiziq bo‘ladi”, – deya izoh qoldirgan.
Qodirov 2017-yildan buyon AQSh Moliya vazirligining sanksiyalar ro‘yxatida qolmoqda, u “Magnitskiy qonuni” doirasida taqiqlarga uchragan.
Avval Ramzan Qodirov ijtimoiy tarmoqlarda “Grozniy” telekanalining sahifalarini kuzatmagan davlat xizmatchisini jamiyat uchun xavfli odam deb hisoblashini aytgandi.
Mavzuga doir: Checheniston rahbari Ramzan Qodirov Putinni umrbod prezidentlikka saylashni taklif qildi
Izoh (0)