Алишер Қодиров коронавируснинг янги тўлқини юзага келмаслиги учун хориждан ўзбекистонликларни олиб келишни тўхтатиш кераклигини айтди

«Миллий тикланиш» демократик партияси Марказий кенгаши раиси Алишер Қодиров хориждан ўзбекистонликларни олиб келишни тўхтатиб, уларни турган мамлакатларида даволашни молиялаштириш кераклигини билдирди.

«Вирусларни аниқлаш ва улар билан курашишда Исроил давлатидаги тажриба ўргангулик. Улар 2020 йилнинг 1 сентябригача барча кирувчилар учун чегараларини ёпди. Нимага? Чунки ичкарига кирган ҳар бир инсон вируснинг янги, бораётган жойидаги муҳитга мослашмаган типини олиб кириши мумкин. Бу янги тўлқин дегани.

Пайғамбаримиз (с.а.в) ҳам ‘Вабо тарқалган жойга бормангиз, агар турган жойингизда вабо бўлса у ердан кетмангиз’, деб бекорга айтмаганлар», — деб ёзган у ўзининг Telegram’даги саҳифасида.

Унинг фикрича, хориждан ўзбекистонликларни олиб келишни тўхтатиб, уларни турган мамлакатларида даволашни молиялаштириш ҳақида ўйлаш керак. «Бу биринчи навбатда ўша ватандошимизнинг қариндошларига, қолаверса, бутун Ўзбекистонга яхшилик бўлади», — дейди у.

Эслатиб ўтамиз, 8 июль куни ўтказилган видеоселектор йиғилишида Президент Шавкат Мирзиёев «яна бир марта халқимизга мурожаат қилиб айтмоқчиманки, чет элдаги қолган фуқароларимизни, албатта, олиб келамиз», деб айтганди.

13 майдан 24 майгача хориждаги ўзбекистонликларни олиб келиш учун 12 та рейс амалга оширилиши белгиланган ва режага асосан амалга оширилганди. 25—31 май кунлари 8 та чартер рейс орқали Россия ва Туркиядан жами 2118 нафар фуқаро Ўзбекистонга олиб келиниши хабар қилинганди. Шунингдек, 1—7 июнь кунлари хориждаги ўзбекистонликларни олиб келиш учун 9 та чартер қатнови, 8—21 июнь кунлари оралиғида 20 та чартер рейс амалга оширилган. 22 июндан 5 июлгача 21 та чартер рейсда хориждаги ўзбекистонликлар олиб келинди.

Республика махсус комиссиясининг қарорига мувофиқ, хориждан Ўзбекистон фуқароларини ватанга олиб келиш учун 6 июлдан 19 июлга қадар амалга ошириладиган чартер рейслар жадвали эълон қилинди, 8 июль куни Республика махсус комиссияси халқаро авиақатновларни хорижий давлатлардаги эпидемиологик вазиятни таҳлил қилган ҳолда икки баравар қисқартиришга қарор қилди.

Эпидемиологик вазият яхшиланиши билан хорижий давлатлардаги мамлакат фуқароларини Ўзбекистонга олиб келиш мақсадида талаб юқори бўлган йўналишларда рейслар сонини сезиларли даражада кўпайтириш чоралари кўрилиши таъкидланган.