Alisher Qodirov koronavirusning yangi to‘lqini yuzaga kelmasligi uchun xorijdan o‘zbekistonliklarni olib kelishni to‘xtatish kerakligini aytdi

“Milliy tiklanish” demokratik partiyasi Markaziy kengashi raisi Alisher Qodirov xorijdan o‘zbekistonliklarni olib kelishni to‘xtatib, ularni turgan mamlakatlarida davolashni moliyalashtirish kerakligini bildirdi.

“Viruslarni aniqlash va ular bilan kurashishda Isroil davlatidagi tajriba o‘rgangulik. Ular 2020-yilning 1-sentabrigacha barcha kiruvchilar uchun chegaralarini yopdi. Nimaga? Chunki ichkariga kirgan har bir inson virusning yangi, borayotgan joyidagi muhitga moslashmagan tipini olib kirishi mumkin. Bu yangi to‘lqin degani.

Payg‘ambarimiz (s.a.v) ham ‘Vabo tarqalgan joyga bormangiz, agar turgan joyingizda vabo bo‘lsa u yerdan ketmangiz’, deb bekorga aytmaganlar”, — deb yozgan u o‘zining Telegram’dagi sahifasida.

Uning fikricha, xorijdan o‘zbekistonliklarni olib kelishni to‘xtatib, ularni turgan mamlakatlarida davolashni moliyalashtirish haqida o‘ylash kerak. “Bu birinchi navbatda o‘sha vatandoshimizning qarindoshlariga, qolaversa, butun O‘zbekistonga yaxshilik bo‘ladi”, — deydi u.

Eslatib o‘tamiz, 8-iyul kuni o‘tkazilgan videoselektor yig‘ilishida Prezident Shavkat Mirziyoyev “yana bir marta xalqimizga murojaat qilib aytmoqchimanki, chet eldagi qolgan fuqarolarimizni, albatta, olib kelamiz”, deb aytgandi.

13-maydan 24-maygacha xorijdagi o‘zbekistonliklarni olib kelish uchun 12 ta reys amalga oshirilishi belgilangan va rejaga asosan amalga oshirilgandi. 25—31-may kunlari 8 ta charter reys orqali Rossiya va Turkiyadan jami 2118 nafar fuqaro O‘zbekistonga olib kelinishi xabar qilingandi. Shuningdek, 1—7-iyun kunlari xorijdagi o‘zbekistonliklarni olib kelish uchun 9 ta charter qatnovi, 8—21-iyun kunlari oralig‘ida 20 ta charter reys amalga oshirilgan. 22-iyundan 5-iyulgacha 21 ta charter reysda xorijdagi o‘zbekistonliklar olib kelindi.

Respublika maxsus komissiyasining qaroriga muvofiq, xorijdan O‘zbekiston fuqarolarini vatanga olib kelish uchun 6-iyuldan 19-iyulga qadar amalga oshiriladigan charter reyslar jadvali e’lon qilindi, 8-iyul kuni Respublika maxsus komissiyasi xalqaro aviaqatnovlarni xorijiy davlatlardagi epidemiologik vaziyatni tahlil qilgan holda ikki baravar qisqartirishga qaror qildi.

Epidemiologik vaziyat yaxshilanishi bilan xorijiy davlatlardagi mamlakat fuqarolarini O‘zbekistonga olib kelish maqsadida talab yuqori bo‘lgan yo‘nalishlarda reyslar sonini sezilarli darajada ko‘paytirish choralari ko‘rilishi ta’kidlangan.