Тошкентнинг Сергели туманида жойлашган Янги Чоштепа даҳасида олиб борилаётган қурилиш ишлари ҳудудида қурувчилар ўртасида оммавий муштлашув содир бўлгани хабар берилган эди. Сергели тумани ИИО ФМБнинг «Дарё»га маълум қилишича, унда иштирок этган беш кишига маъмурий қамоқ жазоси тайинланди.
Эслатиб ўтамиз, воқеа 16 июль, пайшанба куни соат 19:09 ларда «ООО Силвер Тулип» қурувчи ташкилотнинг икки ишчиси — 28 ёшли қашқадарёлик Ў.М. ва андижонлик 30 ёшли М.К. ўртасида «шпател» талашиш сабабли юзага келган. Шундан сўнг жанжалга бошқа ишчилар ҳам қўшилган. Жараён шу ҳудуддаги кўп қаватли уйларда истиқомат қилувчи Ҳ.М. (1992 йилда туғилган) томонидан уяли телефонга ёзиб олиниб, интернетга чиқариб юборилган.
Воқеа жойига ички ишлар ходимлари етиб келиб, жанжалнинг асосий сабабчилари ва иштирокчилари қўлга олинган. Уларнинг беш нафарига нисбатан маъмурий ҳуқуқбузарликка оид ҳужжат расмийлаштирилиб, мазмунан кўриб чиқиш учун судга юборилган.
Сергели туман маъмурий судининг 17 июлдаги қарори билан «ООО Силвер Тулип»нинг беш нафар ишчисининг ҳар бирига Мамурий жавобгарлик тўғрисидаги кодекснинг 183-моддаси (Безорилик) асосида 10 сутка маъмурий қамоқ жазоси тайинланган.
Қайд этилишича, қурилиш ташкилоти 12 та бригададан иборат бўлиб, 439 нафар ишчи ва 33 нафар қоровул ишлайди. Улар билан корхона раҳбари иштирокида тезкор-профилактик суҳбат ўтказилиб, келгусида ҳуқуқбузарлик ва жиноят содир этмаслик тўғрисида расман огоҳлантирилган.
Изоҳ (0)