Ўзбекистон Президенти Шавкат Мирзиёев томонидан коронавирусга чалинган беморларни даволашда янги тактика ишлаб чиқиш кераклиги вазифа қилиб қўйилганди. Соғлиқни сақлаш вазирлигида бугунги ҳолат таҳлил қилиниб, диагностика, даволашдан тортиб, эпидемиология, касаллик тарқалишининг олдини олиш, профилактика масалаларида ҳам янгича услублар қўлланилиши устида иш олиб бориляпти, деб ёзади вазирликнинг жамоатчилик билан алоқалар бўлими.
Президент топшириғига асосан, ҳар бир беморга эътиборни кучайтириш, уларни даволаш сифатини яхшилаш ва айниқса, оғир беморлар билан махсус шуғулланишга катта эътибор қаратилмоқда.
ССВ хабарида қайд этилишича, мамлакат бўйлаб барча беморларга тиббиёт ходимлари алоҳида, оғир беморларга эса бир нечтадан шифокорлар бириктирилди. Бундан ташқари, шифокорлар иштирокида консилиумлар, оғир беморлар учун видеоконсилиумлар ўтказиш, халқаро экспертларни жалб этган ҳолда таҳлиллар ўтказиш, муҳокамалар олиб бориш масаласи қўйилди.
Соғлиқни сақлаш вазири Алишер Шодмонов бошчилигидаги бир гуруҳ соҳа вакиллари Қорақалпоғистонга ташриф буюрди. У ердаги мавжуд ҳолат ўрганилиб, олиб борилаётган профилактика, эпидемиология тадбирларининг сифати танқидий кўриб чиқилди.
Маълумот учун, бугунги кунгача ушбу ҳудудда 275 ҳолатда коронавирус инфекцияси аниқланган бўлиб, уларнинг 193 нафари касалликдан бутунлай фориғ бўлган ҳамда даволаниш кўрсаткичи ҳозирда 70 фоизни ташкил этмоқда. Ҳозиргача ушбу ҳудудда бир бемор вафот этган.
Қорақалпоғистонда айни пайтда 81 нафар бемор даволанаётган бўлиб, улардан 9 нафарининг аҳволи оғир.
Республикага ташриф буюрган гуруҳ томонидан уларни даволашдаги ёндашувлар ўрганилди, Соғлиқни сақлаш вазирлиги томонидан ишлаб чиқарилган стандартлар, протоколларга риоя этилиш даражаси аудит текширувидан ўтказилди.
Асосийси, аҳволи оғир беморлар ҳолати, уларни даволаш жараёнини таҳлил қилиш ва керакли ўзгартиришларни киритиш мақсадида хорижлик ва маҳаллий мутахассислар ва олимлар иштирокида видеоконференция ташкил этилди.
Унда Европа анестезия ва интенсив терапия жамиятининг президенти, Франкфурт университети клиникасидаги Анестезия, интенсив терапия ва касалликларни даволаш клиникаси директори, тиббиёт фанлари доктори, профессор Кай Захаровский, Франкфурт университети клиникасининг анестезиология, интенсив терапия ва шошилинч тиббиёт йўналишидаги мутахассиси, тиббиёт фанлари доктори Холгер Неб иштирок этди.
Коронавирус билан касалланган беморларни самарали даволаш усулларини ишлаб чиққан Германиянинг етакчи тиббиёт мутахассислари аҳволи оғир беморларни самарали даволаш бўйича зарур тавсияларни берди, натижада даво-муолажаларини коррекция қилишга эришилди.
Шу жумладан, Нукус шаҳридаги клиникада даволанаётган Қорақалпоғистон Республикаси Жўқорғи Кенгеси раиси Муса Ерниязов ва Тошкент шаҳрида даволанаётган Сурхондарё вилояти ҳокими Тўра Боболовнинг ҳолати ҳам таҳлил қилинган.
Изоҳ (0)