20 июлдан бошлаб Нью-Йоркда ботаника ва ҳайвонот боғлари очилади, кино саноати, спорт тадбирлари томошабинсиз қайта йўлга қўйилади, бироқ савдо марказлари, музейлар ва кинотеатрлар ёпиқилигича қолади. Бу ҳақда «РИА Новости» хабар берди.
Ҳукумат қарорига кўра, шаҳар эпидемиологик вазиятнинг яхшиланиши фонида очилишнинг 4-фазасига ўтмоқда.
«Кеча Нью-Йоркда коронавирусга 78 239 та тест ўтказилди. 776 кишида вирус аниқланган — бу 1 фоиздан ҳам камроқ. Бу жуда яхши янгилик», — дейди штат губернатори Эндрю Куомо.
Унинг сўзларига кўра, 16 июль куни штатда 10 киши коронавирус қурбонига айланган, шифохоналарда 765 киши қолмоқда. «Ушбу кўрсаткич 48 кишига камайди. Бу 8 мартдан буён кузатилган энг паст кўрсаткич», — дейди губернатор.
Куомонинг таъкидлашича, штатдаги барча ҳудуд 4-босқичга ўтади. Бундан бошқа фазалар йўқлиги сабаб, штат очилишларнинг сўнгги босқичида.
Губернаторнинг эслатишича, 4-босқич мактабларнинг очилишига ҳам русхат беради. Нью-Йоркда қайта очилган ботаника ва ҳайвонот боғлари ташриф буюрувчиларни максимал қабул қилиш қувватининг 33 фоизига хизмат кўрсатади.
Эслатиб ўтамиз, Нью-Йорк тиббиёт хизматлари 11 июль куни тўрт ойдан буён биринчи бор коронавирусдан вафот этиш бўйича бирорта ҳам ҳолатни қайд этмаган.
Изоҳ (0)