АҚШнинг Колорадо штатида яшовчи фуқаро қора ўлатга чалингани қайд этилди, деб хабар бермоқда Denver Post. Аммо шифокорлар ташвишланиш учун жиддий сабаблар йўқ деб ҳисобламоқда.
Қайд этилишича, бу штатда қора ўлатга чалиниш бўйича 2015 йилдан бери кузатилган биринчи ҳолат. Америкалик вирусни олмахондан юқтирган, деб тахмин қилинмоқда. Касалланган бемор соғайиб ҳам бўлган.
14 июль куни Колорадода олмахон қора ўлатга чалингани маълум бўлган. У штат пойтахти Денвер яқинидаги Моррисон шаҳрида қайд этилган биринчи вирус ташувчи бўлди.
Шифокорлар, зарур чоралар кўрилса касаллик тарқалиши уёқда турсин, инфекция юқтириши эҳтимоли жуда кам деб ҳисобламоқда.
Маълумот учун, қора ўлат кемирувчилар (юмронқозиқ, суғурлар, қум сичқонлари, дала сичқонлари ва аҳоли яшайдиган жойлардаги каламушлар)да яшайдиган бургалар орқали тарқалади. Ўлат микроби ҳайвондан одамга ва одамдан одамга трансмиссив йўл билан (масалан, бурга чаққанда), баъзан касал ҳайвон гўштини нимталаганда, шунингдек, овқатга яхши текширилмаган гўшт ишлатилганда юқади.
Аввалроқ Хитойда коронавирусдан ҳам хавфли бўлган қора ўлат тарқалгани, мамлакат шимолидаги Баян-Нур шаҳрида қора ўлат хавфининг учинчи даражаси эълон қилингани тўғрисида хабар берилганди. Тиббиёт фанлари доктори, ўта хавфли касалликлар бўйича мутахассис бўлган россиялик Владислав Жемчугов қора ўлат хавфлилик даражасига кўра, коронавирусдан ҳам биринчи ўринда туришини айтганди.
Изоҳ (0)