2002 йилдан буён ҳар ёзда Сена дарёсининг Лувр яқинидан Сюлли кўпригига қадар бўлган қирғоғи пляжга айланади. Paris Plages шаҳар дастури доирасида у ерга соябонлар, палмалар ўрнатилади ва волейбол майдончалари қурилади, деб хабар беради «Afisha.uz».
18 июль куни Paris Plages 2020’нинг қайтиши шарафига биринчи бор «сувдаги кино намойиши» бўлиб ўтади. Томошабинлар 2018 йилги «Чўкмайдиганлар» француз комедиясини, шунингдек, пандемияга бағишланган Corona Story қисқа метражли фильмини томоша қилишлари мумкин.
Сеанс бепул — биринчи томоша учун чипталар лотерея кўринишида ўйналган, томошабинлар сув устидаги қайиқларга ўтқазилади. Бунинг учун 38 та электроқайиқ тайёрлаб қўйилган бўлиб, уларнинг ҳар бирига олти кишигача одам сиғади (улар бир оиланинг аъзолари ёки дўстлар бўлиши керак).
Қолган томошабинлар учун Сена қирғоғига 150 та шезлонг (енгил креслонинг бир тури) ўрнатилади.
«Кўплаб парижликлар таътилга чиқмайди. Меҳмонлар Парижга келишлари мумкин, айниқса Франциянинг бошқа ҳудудларида истиқомат қилувчилар, хорижликлар эмас. Ва биз уларни мамнуният билан кутиб олишга ва Париждаги байрамона кайфиятни қўллаб-қувватлашга тайёрмиз», — дейди шаҳар мери.
Аввалроқ хорижда одамлар карантин тартибини бузмаслиги учун онлайн-кинотеатрлар, кўнгилочар порталлар бепул ишлаётгани тўғрисида хабар берилганди.
Изоҳ (0)