Голливуд актёри Жон Траволтанинг рафиқаси, актриса Келли Престон вафот этди

Америкалик актёр Жон Траволта Instagram’даги саҳифаси орқали рафиқаси, актриса Келли Престон вафот этганини маълум қилди.

«Жерри Магуаер» фильми юлдузи Келли Престон 57 ёшда эди. У икки йил мобайнида кўкрак саратони билан курашган.

«Юрагимда оғир дард билан маълум қиламанки, гўзал рафиқам Келли саратон билан икки йиллик курашда мағлуб бўлди. У кўпчиликнинг қўллаб-қувваташи билан мудҳиш касалликни енгишга уринди.

Келлининг муҳаббати ва ҳаёти бир умр хотирамизда қолади. Мен онасини йўқотган фарзандларим билан бирга бўлиш учун бироз муддат танаффус қиламан», — деб ёзади Жон Траволта.

https://www.instagram.com/p/CCkgCG5ptxE/

Траволта ва Престон 1991 йилда турмуш қурган. Жуфтлик уч фарзанд кўрган. Уларнинг Жетт исмли ўғли 2009 йилда касаллик туфайли ҳаётдан кўз юмган.