Соғлиқни сақлаш вазирлиги коронавирусга чалинган Сергели ИИО ФМБ подполковниги Абдулазиз Тошевнинг вафот этганини тасдиқлади.
Фото: ИИВ матбуот хизмати
Аввал Ички ишлар вазирлиги ахборот хизмати подполковник А.Тошевнинг коронавирус асоратлари оқибатида вафот этганини хабар қилган, аммо ССВ ушбу ахборотни расман тасдиқламаганди.
Соғлиқни сақлаш вазирлиги хабарига кўра, Тошкент вилоятининг Тошкент туманида яшовчи 42 ёшли фуқаро Т.А. (эркак) 2020 йилнинг 29 июндан 12 июлга қадар Республика шошилинч тез тиббий ёрдам илмий марказининг жарроҳлик бўлимида ўткир панкреатит, ўт қопи жарроҳлик йўли билан олиб ташлаш амалиёти, геморагик панкранекроз, ошқозоности безини дренажлаш ташхиси билан даволанган. Шунингдек, бемордан COVID-19 инфекциясига намуна олинган ва касаллик тасдиқланган.
Унга ўткир тотал ёғли панкреонекроз, ўткир холетцистит, икки томонлама пневмония ташхиси қўйилган. Шунингдек, юрак ишемик касаллиги, стенокардия, гипертония, қандли диабет каби ҳамроҳ касалликлар билан ҳам оғриган.
Шифохонада беморнинг даволаниши давомида тиббиёт мутахассислари томонидан консилиумлар қилинган, даволаш жараёни мутахассислар тавсияси асосида олиб борилган.
Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, мутахассислар томонидан стандартлар асосида ўтказилган реанимацион чораларга қарамасдан, икки томонлама пневмониядан вафот этган, дейилади ССВ хабарида. Вазирлик ўлимнинг қачон содир бўлганига аниқлик киритмаган. ИИВ берган маълумотга асосан подполковник 15 июлда вафот этган.
Маълумотларга кўра, ҳозиргача коронавирусга чалингани тасдиқланган жами тўрт нафар ички ишлар органлари ходими вафот этган (биринчи ўлим ҳолати ҳақида расмий маълумотлар мавжуд эмас).
13 ва 14 июль кунлари Тошкент шаҳар ИИББ майори ва ИИВ подполковниги коронавирус инфекцияси асоратлари оқибатида вафот этгани маълум бўлган, кейинроқ ушбу ўлим ҳолатлари Соғлиқни сақлаш вазирлиги томонидан тасдиқланганганди.
