Тошкент шаҳар Чилонзор туманида яшовчи 53 ёшли эркак коронавирусга чалиниб, ўткир юрак-қон томир ва нафас етишмовчилигидан вафот этди. Бу ҳақда Соғлиқни сақлаш вазирлиги хабар берди.
Маълум қилинишича, Чилонзор туманида яшовчи 53 ёшли фуқаро Ш.А. 6 июль куни ҳолсизлик, тана ҳароратининг кўтарилиши, йўтал, бош оғриғи, ҳансираш пайдо бўлгач, Яккасарой туман тиббиёт бирлашмасига мурожаат қилган ва беморда COVID-19 тасдиқланган. Шундан сўнг у Вирусология илмий-текшириш институти клиникасида даволанишни бошлаган.
Беморга COVID-19 инфекцияси ўта оғир кечиши, икки томонлама пневмония ташхиси қўйилган. Мутахассислар томонидан онлайн консультация ва консилиумлар ўтказилган, даволаш жараёни мутахассислар тавсияси асосида олиб борилган.
Беморда, шунингдек, юрак ишемик касаллиги, қандли диабетнинг 2-тури, семизликнинг 2—3-даражаси борлиги ҳам қайд этилган.
Сўнгги кунларда беморнинг аҳволи ёмонлашган, зудлик билан ўпка, юрак реанимацияси амалга оширилган. Ўтказилган муолажага қарамасдан, юрак ритми тикланмаган ва бемор ўткир юрак-қон томир ҳамда нафас етишмовчилигидан вафот этган.
Мазкур беморнинг вафоти Ўзбекистонда коронавирус оқибатида юзага келган ва Соғлиқни сақлаш вазирлиги томонидан расман тасдиқланган 73-ўлим ҳолати бўлди. Шу билан бирга, Тошкент шаҳар Сергели тумани бўйича ИИО ФМБ подполковниги ва Давлат хизматлари агентлигининг бир ходими ҳам коронавирусдан вафот этган, бироқ Соғлиқни сақлаш вазирлиги ҳозирча мазкур иккита ўлим бўйича расмий маълумот бергани йўқ.
Аввалроқ, 13 ва 14 июль кунлари Тошкент шаҳар ИИББ майори ва ИИВ подполковниги коронавирус инфекцияси асоратлари оқибатида вафот этгани маълум бўлган, кейинроқ ушбу ўлим ҳолатлари Соғлиқни сақлаш вазирлиги томонидан тасдиқланган эди.
Изоҳ (0)