Тошкент вилоятида 37 туп дарахт кесилиб, табиатга 1 млрд сўмдан ортиқ зарар етказилгани аниқланди

Тошкент вилоятининг Нурафшон шаҳрида жами 37 туп ҳар хил турдаги манзарали дарахтлар кесиб ташлангани аниқланди. Бу ҳақда Давлат экология қўмитаси матбуот хизмати хабар берди.

6 июль куни Тошкент вилояти экология ва атроф-муҳитни муҳофаза қилиш бошқармаси давлат инспекторлари томонидан олиб борилган тезкор рейд давомида Нурафшон шаҳри «Қорасув» маҳалласи, Тошкент йўли кўчаси, 4R-2 автомобиль йўлининг Тўйтепа текстиль фабрикасигача бўлган қисмида жами 37 туп ҳар хил турдаги манзарали дарахтлар кесиб ташлангани аниқланган.

Оқибатда «Ўсимлик дунёсини муҳофаза қилиш ва ундан фойдаланиш тўғрисида»ги қонуннинг 37 ва 45-моддалари талаблари бузилган, ўсимлик дунёсига 1,1 миллиард сўм зарар етказилган.

Ҳолат юзасидан қонунбузарларга нисбатан қонуний чора кўриш ҳамда етказилган зарарни ундириш мақсадида тўпланган ҳужжатлар прокуратура органларига юборилган.

Эслатиб ўтамиз, Президентнинг тегишли фармони билан давлат ўрмон фондига кирмайдиган дарахтлар ва буталар қимматбаҳо навларининг кесилишига 2019 йил 1 ноябрдан 2020 йил 31 декабргача мораторий жорий этилган. Шунга қарамай, жойларда дарахтларнинг ноқонуний кесилиш ҳолатлари содир бўлмоқда.

Хусусан, 2020 йилнинг февраль ойида Тошкентда тадбиркор 81 та дарахтни кесиб ташлагани аниқланганди. Унинг ўсимлик дунёсига етказилган зарари 603 миллион 421 минг сўмни ташкил этган. Мамлакат раҳбарияти томонидан қонунбузарларга нисбатан аёвсиз чора кўрилган. 2 нафар айбланувчидан 1 миллиард 891,3 миллион сўм моддий зарар ундирилди, бир қатор масъуллар ҳайфсан олди.

Шу воқеадан сўнг Тошкент шаҳар прокурори Баҳриддин Валиев шаҳарнинг ҳар бир туманида бир миллион донадан дарахт экилиш акцияси ўтказилишини эълон қилганди. Бироқ у қачон ўтказилиши ва дарахтлар қачонгача ўтқазиб бўлиниши режалаштирилгани очиқланмаган.

Апрель ойида эса Сирдарё ва Нурафшон туманлари ҳоким ўринбосарлари дарахтларни ноқонуний кесишга буйруқ бергани аниқланганди.