Фарғона вилояти Бешариқ туманида 41 ёшли Д.П. рафиқаси билан қўл узатиб саломлашмоқчи бўлган қўшниси И.Р.га тан жароҳати етказди. Бу ҳақда ИИВ ҳузуридаги Тергов департаменти хабар қилган.
Қайд этилишича, 2020 йилнинг 29 июнь куни соат 20:00 да Бешариқ туманида яшовчи 41 ёшли Д.П. қўшниси 42 ёшли И.Р. билан жанжаллашган. Жанжал И.Р.нинг Д.П.нинг рафиқасига қўл узатиб сўрашмоқчи бўлгани ва унга илиқ муомала қилиши оқибатида келиб чиққан. Д.П. қўшниси билан тортиб, бетон зина устида турган И.Р.ни иккала қўли билан елкасидан қасддан уриб итариб юборган.
Ўтказилган суд тиббий экспертиза хулосасига кўра, И.Р.нинг зинадан йиқилиб, оғир тан жароҳати олганлиги аниқланган.
Ҳолат юзасидан Бешариқ тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 104-моддаси 1-қисми (Қасддан баданга оғир шикаст етказиш) билан жиноят иши қўзғатилган. Мазкур модданинг биринчи қисми бўйича айбдор деб топилган жиноятчига уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш жазоси тайинланиши мумкин.
Аввал Қашқадарёда ҳимоя ордери берилган хотинига зўравонлик қилган эр 15 суткага қамалгани, Қашқадарёда 39 ёшли хотинини нотаниш эркакдан рашк қилган эр уни уриб ўлдириб қўйгани, Самарқандда шаръий никоҳдаги аёлини рашк қилиб, унга пичоқ билан жароҳат етказган шахс 6 йилга озодликдан маҳрум этилгани ҳақида хабарлар берилган.
Изоҳ (0)