Тошкент шаҳрининг Юнусобод туманида 55 ёшли эркак коронавирусдан вафот этди. Бу ҳақда Соғлиқни сақлаш вазирлиги хабар берди.
Хабарда қайд этилишича, Юнусобод туманида яшовчи 55 ёшли Ш.А. 12 июль куни 2-сон юқумли касалликлар шифохонасидан оғир аҳволда тез тиббий ёрдам машинасида Зангиота туман кўп тармоқли юқумли касалликлар шифохонасига олиб келинган. Аҳволи ўта оғирлиги сабабли бемор зудлик билан реанимация бўлимига ётқизилган ҳамда сунъий нафас олдириш аппаратига уланган.
Унга COVID-19 инфекцияси ўта оғир кечиши, икки томонлама пневмония ташхиси қўйилган. Хасталик ўткир нафас етишмовчилиги билан кечган. Шунингдек, қандли диабет, сурункали буйрак етишмовчилиги ҳамроҳ касалликлари билан ҳам оғриган.
Шифохонада беморнинг даволаниши давомида тиббиёт мутахассислари томонидан консилиумлар қилинган, даволаш жараёни мутахассислар тавсияси асосида олиб борилган.
Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас, сурункали жигар-буйрак ҳамда ўпка-юрак етишмовчилигидан вафот этган.
Чилонзорлик бемор Ўзбекистонда COVID-19 инфекцияси асоратлари оқибатида вафот этган 73-қурбонга айланди.
Аввалроқ Ички ишлар вазирлигининг икки нафар ходими 70 ҳамда 71-ўлим сифатида Соғлиқни сақлаш вазирлиги статистикасига қўшилгани тўғридаи хабар берилган. Коронавирусдан вафот этган Давлат хизматлари агентлиги ходими эса 72-қурбон сифатида қайд этилган.
Изоҳ (0)