Тошкент шаҳар ҳокими Жаҳонгир Ортиқхўжаев пойтахтда жойлашган Ибн Сино номидаги 1-сонли шаҳар клиник шифохонасида бўлиб, ундаги шароитлар билан танишди ҳамда COVID-19 билан хасталанган фуқароларнинг оила аъзолари билан суҳбатлашди. Бу ҳақда Тошкент шаҳар ҳокимлиги маълум қилди.
Таъкидланишича, ҳоким мулоқот давомида касалхонада даволанаётганларнинг тезда шифо топиши учун барча шароитлар, жумладан, дори-дармонлар ва озиқ-овқатлар таъминоти тўлиқ эканлигини айтиб ўтди. Шунингдек, у фуқароларнинг кўрсатилаётган тиббий ёрдам қониқарли эмаслиги тўғрисида хавотирли фикрларини тинглаб, уларнинг саволларига атрофлича жавоб берди.
Жаҳонгир Ортиқхўжаев мутасаддиларга фуқароларнинг эҳтиёж ва илтимосларини ўрганиб, уларни талаб даражасида қондириш юзасидан топшириқлар берди.
Шундан сўнг шаҳар ҳокими Тошкент шаҳар Тез тиббий ёрдам хизмати диспетчерлик марказида бўлиб, келиб тушаётган мурожаатларнинг қабул қилиниш жараёнини кўздан кечирди. Мавжуд муаммоларга жойида ечим таклиф қилиб, топшириқлар берилди.
Қайд этилишича, Жаҳонгир Ортиқхўжаев марказ ходимларига фуқаролардан мурожаатларни тез қабул қилиш, тиббий ёрдам гуруҳларини мурожаат манзилларига ўз вақтида жўнатиш ва аҳоли билан самимий мулоқотда бўлиш юзасидан тавсиялар берди.
Эслатиб ўтамиз, Шавкат Мирзиёев раислигида 15 июль, чоршанба куни бўлиб ўтган йиғилишда коронавирус тарқалишининг олдини олиш ва даволаш бўйича Тошкент шаҳридаги ишларни талаб даражасида ташкил этмагани, эпидемиологик вазиятнинг салбий ўзгаришларига тайёр бўлишни таъминламагани, бу касаллик билан «пастга тушиб» мукаммал шуғулланмагани учун соғлиқни сақлаш вазири Алишер Шодмонов ва Тошкент шаҳар ҳокими Жаҳонгир Ортиқхўжаевга ҳайфсан эълон қилинганди. Шунингдек, Шавкат Мирзиёев Тошкент шаҳри ва вилояти раҳбарларини танқид қилди.
Тошкентда охирги 3 кунда тез тиббий ёрдамнинг вақтида етиб бормагани сабабли 43 киши турли касалликлар билан вафот этган.
Аввалроқ Тошкент шаҳрида 16 та шифохона коронавирусга чалинган фуқароларни даволаш учун ишлаётгани, яна бешта шифохонада касалликнинг енгил ва ўрта даражаси билан оғриган, яъни қўшимча кислородга муҳтож бўлмаган беморлар даволанаётгани маълум қилинганди.
Изоҳ (0)