Toshkent shahar hokimi Jahongir Ortiqxo‘jayev poytaxtda joylashgan Ibn Sino nomidagi 1-sonli shahar klinik shifoxonasida bo‘lib, undagi sharoitlar bilan tanishdi hamda COVID-19 bilan xastalangan fuqarolarning oila a’zolari bilan suhbatlashdi. Bu haqda Toshkent shahar hokimligi ma’lum qildi.
Ta’kidlanishicha, hokim muloqot davomida kasalxonada davolanayotganlarning tezda shifo topishi uchun barcha sharoitlar, jumladan, dori-darmonlar va oziq-ovqatlar ta’minoti to‘liq ekanligini aytib o‘tdi. Shuningdek, u fuqarolarning ko‘rsatilayotgan tibbiy yordam qoniqarli emasligi to‘g‘risida xavotirli fikrlarini tinglab, ularning savollariga atroflicha javob berdi.
Jahongir Ortiqxo‘jayev mutasaddilarga fuqarolarning ehtiyoj va iltimoslarini o‘rganib, ularni talab darajasida qondirish yuzasidan topshiriqlar berdi.
Shundan so‘ng shahar hokimi Toshkent shahar Tez tibbiy yordam xizmati dispetcherlik markazida bo‘lib, kelib tushayotgan murojaatlarning qabul qilinish jarayonini ko‘zdan kechirdi. Mavjud muammolarga joyida yechim taklif qilib, topshiriqlar berildi.
Qayd etilishicha, Jahongir Ortiqxo‘jayev markaz xodimlariga fuqarolardan murojaatlarni tez qabul qilish, tibbiy yordam guruhlarini murojaat manzillariga o‘z vaqtida jo‘natish va aholi bilan samimiy muloqotda bo‘lish yuzasidan tavsiyalar berdi.
Eslatib o‘tamiz, Shavkat Mirziyoyev raisligida 15-iyul, chorshanba kuni bo‘lib o‘tgan yig‘ilishda koronavirus tarqalishining oldini olish va davolash bo‘yicha Toshkent shahridagi ishlarni talab darajasida tashkil etmagani, epidemiologik vaziyatning salbiy o‘zgarishlariga tayyor bo‘lishni ta’minlamagani, bu kasallik bilan “pastga tushib” mukammal shug‘ullanmagani uchun sog‘liqni saqlash vaziri Alisher Shodmonov va Toshkent shahar hokimi Jahongir Ortiqxo‘jayevga hayfsan e’lon qilingandi. Shuningdek, Shavkat Mirziyoyev Toshkent shahri va viloyati rahbarlarini tanqid qildi.
Toshkentda oxirgi 3 kunda tez tibbiy yordamning vaqtida yetib bormagani sababli 43 kishi turli kasalliklar bilan vafot etgan.
Avvalroq Toshkent shahrida 16 ta shifoxona koronavirusga chalingan fuqarolarni davolash uchun ishlayotgani, yana beshta shifoxonada kasallikning yengil va o‘rta darajasi bilan og‘rigan, ya’ni qo‘shimcha kislorodga muhtoj bo‘lmagan bemorlar davolanayotgani ma’lum qilingandi.
Izoh (0)