Россиянинг Амур вилоятида газни қайта ишлаш заводи қурилишини амалга ошираётган «Ренессанс Хеви Индастрис» компанияси ишчилари уч ой давомида маош олмаганлиги сабабли исён кўтаргани, улар орасида ўзбекистонликлар ҳам борлиги тўғрисида хабар берилганди. Ўзбекистоннинг Россиядаги элчихонаси мазкур ҳолат назоратга олинганини маълум қилди.
Маълумотларга кўра, Ўзбекистоннинг Россиядаги элчихонаси 13 июль куни Амур вилоятидаги вақтинчалик вахта шаҳарчасида Ўзбекистон фуқаролари иштирокида юз берган ҳодисани назоратга олган. Мазкур масала бўйича Россия Ички ишлар вазирлиги ва бошқа ваколатли органлар билан мунтазам мулоқот олиб борилмоқда.
«Бўлиб ўтган ҳодиса тафсилотларини аниқлаш ҳамда Ўзбекистон фуқароларининг қонуний ҳуқуқ ва манфаатлари ҳимоясини таъминлаш мақсадида воқеа жойига элчихона бош консули етиб борди», — дейилади хабарда.
Элчихона россиялик ҳамкорлар билан биргаликда можарони келтириб чиқарган сабаб ва шарт-шароитларни ўрганиш, муаммонинг барча томонлар учун мақбул бўлган ечимни ишлаб чиқиш бўйича иш жараёни ва натижалар ҳақида қўшимча ахборот беради.
Амур вилояти прокуратураси томонидан маълум қилинишича, ҳолат юзасидан хорижлик ишчиларнинг меҳнат ҳуқуқининг бузилиши бўйича текширув бошланган. Шу билан бирга, тартибсизликни юзага келтирган ишчиларга нисбатан «Безорилик» моддаси билан жиноят иши қўзғатилган.
Изоҳ (0)