Ҳабибулла Оқилов: Хусусий тиббиёт муассасаларида коронавирусга тест олишни тақиқлаш бўйича ҳеч қандай кўрсатма йўқ

Соғлиқни сақлаш вазирлиги ҳузуридаги коронавирусга қарши кураш штаби аъзоси Ҳабибулла Оқилов хусусий тиббиёт муассасаларида коронавирусга тест олишни тақиқлаш бўйича ҳеч қандай кўрсатма йўқлигини маълум қилди.

АОКАда 14 июль, сешанба куни бўлиб ўтган брифингда профессорга «Хусусий клиникаларда коронавирусга тест олишни тақиқлаш ҳақида кўрсатма бўлгани, энди фақат битта жойда тест топшириш мумкинлиги ростми? Қаерда, айнан қандай тест топшириш керак? Антитана ёки коронавирусга? 2 ҳафтадан сўнг туғаман, ҳар бир янгилик жунбушга соляпти», — деган савол берилган.

Мутахассис бундай кўрсатма йўқлиги, Соғлиқни сақлаш вазирлиги расмий сайтларида ПЗР ва ИФА тестларини олувчи лабораториялар рўйхатини эълон қилинганлиги, уларнинг аксарияти Тошкент шаҳрида жойлашган бўлса-да, вилоятлар марказларида ҳам тест топшириш имконияти яратилганини билдирган.

Шу билан биргаликда, хусусий клиникалар ҳам ўзида қабул қилиш, ҳам мурожаат қилувчиларнинг уйига бориб таҳлил олиш шаклида фаолият кўрсатаётгани таъкидланди.

Эслатиб ўтамиз, аввалроқ Ўзбекистон адлия вазири маслаҳатчиси Шаҳноза Соатова Telegram’даги канали орқали ўзида коронавирус белгилари кузатилаётган бўлса-да, тест топшира олмаётгани, Олий Мажлис Қонунчилик палатаси депутати Мадина Баратова уч кундан буён коронавирусга топширган тести жавобини ололмаётгани ҳақида ёзган эди. Санитария-эпидемиологик осойишталик агентлиги Жамоатчилик ва оммавий ахборот воситалари билан алоқалар бўлими эса хусусий клиникаларга коронавирусга тест олишни тўхтатиш ҳақида топшириқ берилгани ҳақидаги гап-сўзлар ҳақиқатга мос келмаслигини билдирган.