Хусусий клиника ва лабораторияларда олинган тест натижалари мусбат чиқса, умумий статистикага қўшилади. Бу ҳақда Соғлиқни сақлаш вазирлиги ҳузуридаги коронавирусга қарши кураш штаби аъзоси Ҳабибулла Оқилов маълум қилган.
Жумладан, АОКА ҳузуридаги штабга келиб тушган «Хусусий клиникаларда олинган тест натижалари ҳам умумий олинган тест натижалари статистикасига қўшиладими?», деган саволга мутахассис қуйидагича жавоб берган:
«Хусусий клиника ва лабораторияларда олинган тест натижалари мусбат чиққан ҳолда, касаллик тасдиқланганлиги ҳақида ахборот беморнинг яшаш манзили бўйича тегишли Эпидемиологик осойишталик агентлигининг ҳудудий марказларига етказилиши ва албатта, ҳар бир бундай ҳолат умумий статистикага қўшилиши шарт».
Эслатиб ўтамиз, Санитария-эпидемиологик осойишталик агентлиги директори Баҳодир Юсуфалиев 12 июль куни «Ўзбекистон 24» телеканалига берган интервьюсида тестлар захирасида 1 миллионта тест мавжудлиги, Ўзбекистонда 8 та хусусий тиббиёт муассасасида коронавирусга тест топшириш мумкинлигини айтган эди. Шунингдек, кунига 20-22 мингта тест олинётгани, бу мингта аҳолига нисбатан 42 тани ташкил этиши билдирилган.
Изоҳ (0)