Коронавирусга қарши кураш штаби аъзоси Ҳабибулла Оқилов 14 июль, сешанба куни бўлиб ўтган матбуот анжуманида Ўзбекистондаги коронавирус аниқланган шифохоналарни 14 кунга ёпиш нотўғри бўлганини айтди.
«Коронавирусга мўлжалланмаган шифохоналарда коронавирус аниқланса, уни 14 кунга ёпиб ташлар эдик. Жаҳон тажрибаси шуни кўрсатдики, бу нотўғри йўл», — деди Оқилов.
Унинг маълум қилишича, ҳозирги пайтда касалхонанинг бирор бўлимидан коронавирус чиқадиган бўлса, ўша бўлимнинг ўзи бир кунга ёпилмоқда.
«Ходимлар яккаланмоқда ёки карантинга оляпти. Керакли чоралар ўтказилгандан кейин, таҳлиллар олингандан кейин, эртасига очиляпти. Шунинг учун қайсидир шифохона карантинга ёпилди, дейиш мутлақо нотўғри», — деди Ҳабибулла Оқилов.
Аввалроқ Ҳабибулла Оқилов Тошкент шаҳрида 16 та шифохона коронавирусга чалинган фуқароларни даволаш учун ишлаётгани, Зангиотадаги махсус клиника очилганига бир ҳафта бўлмасдан беморларга тўлиб бўлганини маълум қилганди. Шунингдек, у агар касаллар сонининг ошиши шу тарзда давом этса, бошқа клиникалар ҳам коронавирусни даволаш учун мослаштирилиши мумкинлигини қайд этди.
Эслатиб ўтамиз, Ўзбекистонда коронавирус қайд этилганидан кейин Тошкент шаҳридаги бир қатор тиббиёт муассасалари карантинга ёпилди. Улар қаторидан Республика перинатал маркази, 17-шаҳар клиник шифохонаси ва 8-оилавий поликлиника, 6-сонли туғруқхона, 62-сонли оилавий поликлиника ўрин олган.
Изоҳ (0)