АҚШда яшаётган яна бир ўзбекистонлик актёр Аҳмад Бердимуродов ҳаётидаги энг катта йўқотиш ҳамда орзулари ҳақида гапирди

Ўзбекистонлик таниқли актёр Аҳмад Бердимуродов бир неча йиллардан бери Американинг Лос-Анжелес шаҳрида яшайди. Актёр «Снайпер», «Зиддият», «Orville», «NCIS Los Angeles» каби қатор Голливуд сериалларида суратга тушган, 5 йилдан бери «Оскар» мукофоти тақдимот маросимининг махсус 7 тансоқчиларидан бири.

Журналист Жасур Ҳамроев Аҳмад Бердимуродов билан тўғридан-тўғри эфирда суҳбат уюштирди. Ушбу суҳбат давомида актёрнинг мухлислари ўзларини қизиқтирган саволларга жавоб олди.

«Америкада яшаётган бўлсам-да, ҳали ҳам Ўзбекистон фуқаросиман. Бир неча йил аввал санъатга кириб келганимда Голливуд киносининг сир-асрорларини ўрганишни мақсад қилгандим. Шу мақсадимни амалга ошириш учун Америкага келдим. Ҳалигача бутун дунёда биринчи ўринда турадиган киносаноатининг сир-асрорларини ўрганиб келмоқдаман. Голливудда ҳар йили ҳамма нарса ўзгаради, янги технологиялар жорий этилади. Ўрганишдан ҳали ҳам тўхтаганим йўқ», — дейди Аҳмад Бердимуродов.

Шунингдек, актёр ҳаётидаги энг катта йўқотиши ҳамда орзулари ҳақида ҳам сўзлаб берди.

«Ҳаётимдаги энг катта йўқотиш — авваламбор ота-онамни йўқотганим. Бундан ташқари, 1 йил аввал турмуш ўртоғим — Лайлони бериб қўйдик. Унинг ўлимидан сўнг ҳалигача ўзимга кела олмадим», — дейди актёр.

Аҳмад Бердимуродов уч нафар — икки қиз ва бир ўғил фарзанди борлиги, улар ҳозир Тошкентда эканлигини айтди. Актёрнинг ўғли унинг изидан бориб, режиссура соҳасида таҳсил олмоқда. У Жаҳонгир Аҳмедовнинг «Илҳақ» фильмида Зулфия аянинг невараси образини гавдалантирган.

Актёр энг катта орзуларидан бири «Оскар» мукофотини қўлга киритиш эканлигини айтади.

Маълумот учун, асли касби ҳуқуқшунос бўлган Аҳмад Бердимуродов «Шайтанат» сериалида Жамшид образини гавдалантирганидан сўнг актёр сифатида танилган. У «Паноҳ», «Севгинатор», «Қалбим ўғриси», «Макрли дунё» фильмларида ҳамда «Меҳмонхона» сериалида турли образларни гавдалантирган.