Журналист ва блогер Никита Макаренко муаллифлигида «Фарғона вилоятидаги хонадонларда нефть қазиб олинмоқда» сарлавҳаси остида видео YouTube порталига жойланди. Бу видео юзасидан Фарғона нефтни қайта ишлаш заводи (ФНҚИЗ) ва Фарғона вилояти Тошлоқ тумани ҳокимлиги расмий муносабат билдирди.
Видеолавҳа юзасидан Фарғона нефтни қайта ишлаш заводи қуйидагиларни маълум қилди.
Фарғона нефтни қайта ишлаш заводининг 60 йилдан ортиқ фаолияти давомида турли хил технологик носозликлар (хом ашё ва тайёр маҳсулотларнинг чиқиб кетиши) натижасида, сувли қатламда нефть маҳсулотларининг суюқлик (ерости сувлари юзасида сузувчи) ва эритилган шакллари мавжудлиги билан тавсифланган кучли ерости сувлари ифлосланиши шаклланган.
Йиллар давомида ушбу муаммони бартараф қилиш учун «Ўзбекгидрогеология» Давлат гидрология илмий-тадқиқот институти томонидан «Ўзнефтқайтаишлаш» ОАЖ ва Фарғона нефтни қайта ишлаш заводи ифлосланишни локализация қилиш ва йўқ қилиш чоралари кўриб келинмоқда.
Шунингдек, май ойида аниқланган Тошлоқ тумани ҳудудида нефть маҳсулотларини ноқонуний қазиб олиш ва қайта ишлашга қарши курашиш бўйича иккита кенг кўламли чора-тадбирлар кўрилди.
Натижада нефть маҳсулотларини ноқонуний қазиб олиш, қайта ишлаш ва ишлаб чиқариш билан шуғулланувчи бир қатор корхоналар ва аҳолининг ноқонуний фаолияти аниқланди ва ҳужжатлаштирилди. Шундай қилиб, тадбирлар давомида нефть қазиб олиш учун 117 та қудуқ, 52 дона чуқур насос, 205 дона турли ҳажмдаги сақловчилар, 9 757 метрдан ортиқ электр кабель, 847 метр турли шланглар ва 29,8 минг литр нефть ва нефть маҳсулотлари тортиб олинган.
Заводнинг қайд этишича, 2020–2023 йилларда заводни модернизация қилиш дастури доирасида янги технологиялар ва замонавий асбоб-ускуналар ёрдамида атроф-муҳит ифлосланишининг олдини олиш бўйича комплекс чора-тадбирлар амалга оширилиши кўзда тутилган.
Мавзуга доир: Фарғонада 2023 йилдан бошлаб Аи-92 бензин ва «Евро-5» стандартидаги дизель ишлаб чиқарилади
Ўрганиш жараёнида 2020 йилнинг 10 июлига қадар Давлат хавфсизлик хизмати, туман ИИБ, иқтисодий жиноятларга қарши курашиш департаменти ҳамда экология ва атроф-муҳитни муҳофаза қилиш соҳасидаги назорат бўйича туман инспекцияси ходимлари томонидан мунтазам тезкор назорат тадбирлари ўтказилаётганлиги аниқланди.
Мазкур ҳудудда ноқонуний равишда қудуқ қазиб, нефтга ўхшаш суюқликни насос ёрдамида тортиб олиш жараёнида ерни ифлослантирган 50 нафар фуқароларга нисбатан Маъмурий жавобгарлик тўғрисидаги кодекснинг 65-моддаси 4-қисмига (Қишлоқ хўжалиги ва бошқа ерларни кимёвий ва радиоактив моддалар ҳамда оқова сувлар билан ифлослантириш) асосан маъмурий баённомалар тузилган.
Айбланувчиларга нисбатан 38 миллион 802 минг сўм жарима жазоси тайинланган. Бу ҳолатдан ташқари нефтга ўхшаган суюқликни яроқсиз қисмини очиқ сув ҳавзасига оқизиб, сувни ифлослантирган 8 нафар фуқарога нисбатан эса Маъмурий жавобгарлик тўғрисидаги кодекснинг 72-моддаси 1-қисмига (Сув захираларини муҳофаза қилиш қоидаларини бузиш) асосан маъмурий баённомалар расмийлаштирилиб 5 миллион 798 минг сўм жарим қўлланилган.
Саноат чиқиндиларини белгиланмаган жойга ташлаган 12 нафар фуқарога нисбатан ҳам Маъмурий жавобгарлик тўғрисидаги кодекснинг 91-моддаси 1-қисмига (Саноат чиқиндиларини, маиший чиқиндиларни ва бошқа чиқиндиларни тўплаш, ташиш, жойлаштириш, зарарсизлантириш, сақлаш, утилизация қилиш, қайта ишлаш, реализация қилиш чоғида табиатни муҳофаза қилиш талабларини бузиш) асосан 10 миллион 258 минг сўм жарима жазолари тайинланган.
Ҳуқуқбузарлик содир этган шахсларга маъмурий чоралар қўллаш билан бирга 81 та ноқонуний қазиб олинган қудуқлар кўмилди, 81 дона «Орёл» сув насослари, 426 метр резина шланг, 154 дона турли ҳажмдаги идишлар, 22 740 литр нефть аралашган суюқликлар далолатнома ва баённомалар асосида вақтинчалик сақлаш учун туман ИИБга олинди.
Изоҳ (0)