“O‘zgidromet”ning may oyidagi monitoringi bo‘yicha Olmaliq atmosfera havosi eng iflos shahar bo‘lib chiqdi

“O‘zgidromet” tomonidan 2020-yil may oyida o‘tkazilgan atmosfera havosi ifloslanishi monitoringi natijalariga ko‘ra, 24 ta shaharda havoning ifloslanish darajasi past bo‘lgan, yuqori ifloslanish darajasi Olmaliq shahrida AIIning 8,85 ga teng qiymati bilan qayd etilgan, deyiladi markaz xabarida.

Xabarga ko‘ra shaharlarda atmosfera havosi ifloslanishi sanoat korxonalari ajratmalarining tarqalishi va meteosharoitlarga bog‘liq. Umuman, respublika bo‘yicha 2020-yil mayda atmosfera havosining ifloslanish darajasi me’yor chegarasida bo‘lgan.

O‘tkazilgan radiatsiyaviy monitoring bo‘yicha 2019-yil mayda radiatsiyaviy gamma-fonning o‘rtacha qiymatlari ruxsat berilgan me’yor (0,30 mkz/ch)dan oshmagan.

Respublika bo‘yicha o‘rtacha gamma-fon qiymati 0,15mkZv/ch’ni tashkil qilgan.

Shahar atmosfera havosi ifloslanish darajasini tavsiflash uchun standart integral ko‘rsatkich — atmosferaning ifloslanish indeksi (AII)dan foydalaniladi, u beshta asosiy ifloslantiruvchi ingrediyent (chang, oltingugurt dioksidi, uglerod oksidi (is gazi), azot dioksidi, azot oksidi) bo‘yicha hisoblanadi. AIIning 5 balldan kam qiymati past ifloslanish darajasiga to‘g‘ri keladi.

Havoning ifloslanish darajasi AII 0-4 bo‘lganda past, AII 5-6 bo‘lganda oshgan va AII 7-14 bo‘lganda yuqori, AII> 14 bo‘lganda eng yuqori hisoblanadi.

2019-yil sentabrda Toshkent jahonning havosi eng iflos shaharlari reytingida 2-o‘rinni egallagan, “O‘zgidromet” ushbu ma’lumotga munosabat bildirib, mazkur ma’lumotlar vaqtinchalik, iqlim va geografik sharoitlarga bog‘liqligini qayd etgandi. Keyinchalik mazkur markaz 20 yil ichida Toshkent shahri uchun ifloslanish darajasi o‘zgarishlarini ko‘rib chiqib, 1990-yillarga nisbatan oxirgi 10 yil ichida Toshkent bo‘yicha ifloslanish darajasi pasayganini bildirgan.