Маҳалла ва оилани қўллаб-қувватлаш вазирлиги ҳамда вазирликнинг ҳудудий бошқармалари қошида 2020 йилнинг 1 апрелидан 20 майига қадар ташкил этилган Ҳомийлик хайрияларни мувофиқлаштириш марказлари фуқаролардан пул маблағларини қабул қилмаган. Бу ҳақда 12 июль куни АОКА ҳузуридаги штабда ўтказилган брифингда Маҳалла ва оилани қўллаб-қувватлаш вазири Раҳмат Маматов таъкидлаб ўтди.
Маматовнинг таъкидлашича, карантин даврида хайрия пул маблағларининг сарфланиши вазирлик ваколатидаги масала эмас.
«Ижтимоий тармоқларда Ҳомийлик хайрияларини мувофиқлаштириш марказлари томонидан пул маблағлари қабул қилингани ва ушбу маблағларнинг сарфланиши бўйича маълумотлар очиқланмаганлиги ҳақидаги фикрларга нисбатан айтиб ўтишим зарурки, Ҳомийлик хайрияларини мувофиқлаштириш марказларига пул маблағлари қабул қилингани йўқ.
Марказлар жисмоний ва юридик шахслар томонидан ҳомийлик асосида тақдим этилган фақат озиқ-овқат, тиббий буюмлар ва бошқа зарур маҳсулотларни қабул қилиб, санитария ва гигиена қоидаларига риоя қилган ҳолда муҳтож оилаларга етказиб берди.
Республика махсус комиссиясининг 14-сонли баёни тегишли бандларига асосан, ҳомий ташкилот ва шахсларнинг пул кўринишидаги хайрия маблағлари Соғлиқни сақлаш вазирлиги ҳузурида ташкил этилган «Меҳр-шафқат ва саломатлик» жамоат фондига ўтказилиши белгиланган эди.
Ҳомийлик хайрияларни мувофиқлаштириш марказлари 20 май куни ўз фаолиятини тугатиши муносабати билан қолган хайрия маҳсулотларини эҳтиёжманд оилаларга етказиб бериш мазкур марказларнинг мантиқий давоми сифатида ташкил этилган «Саховат ва кўмак» умумхалқ ҳаракати орқали амалга оширилиши йўлга қўйилди.
Ҳомий ташкилотлар ва фуқароларнинг хайрия пул маблағлари эса «Маҳалла» хайрия жамоат фондининг республика бошқаруви ҳамда ҳудудий бўлинмалари ҳузурида ташкил этилган «Саховат ва кўмак» жамғармаси орқали қабул қилиниши ҳамда ўрнатилган тартибда сарфланиши белгиланди.
«Кенг жамоатчилик билиши керак бўлган яна бир муҳим масала – «Маҳалла» хайрия жамоат фонди Васийлик кенгашининг 2020 йил 25 майдаги 4-сон баёни билан тасдиқланган «Маҳалла» хайрия жамоат фондининг уставида «Маҳалла» хайрия жамоат фонди ташкилий-ҳуқуқий шакли жамоат фонди бўлган нодавлат нотижорат ташкилоти сифатида белгилаб қўйилган. Яъни «Маҳалла» хайрия жамоат фонди Маҳалла ва оилани қўллаб-қувватлаш вазирлиги тизимидан алоҳида фаолият юритувчи мустақил тузилма», — деб таъкидлади вазир.
Раҳмат Маматовнинг айтишича, «Маҳалла» хайрия жамоат фонди «Саховат ва кўмак» жамғармаси фаолиятини Маҳалла ва оилани қўллаб-қувватлаш вазирлигидан мустақил ҳолда олиб бормоқда. Жамғармага келиб тушган хайрия маблағларини ўрнатилган тартибда сарфланишига ягона масъул ташкилот ҳам «Маҳалла» хайрия жамоат фонди ҳисобланади.
Вазирнинг қўшимча қилишича, Ҳомийлик хайрияларини мувофиқлаштириш марказлари 2020 йилнинг апрель—май ойларида фаолият юритди. Бу вақт оралиғида маҳаллаларда шакллантирилган рўйхат ҳамда 1197 қисқа рақами орқали келиб тушган мурожаатлар асосида 9 минг 145 та МФЙларда истиқомат қилувчи 413 минг 72 та эҳтиёжманд оилаларга 49 миллиард 910 миллион сўм миқдорида ҳомийлик хайриялари етказиб берилди.
Изоҳ (0)