Ўзбекистонлик кимёгар ва фармацевтларнинг етакчи вакилларидан бири, тажрибали педагог, фан арбоби, кимё фанлари доктори, профессор Собиржон Нигматович Аминов 9 июль куни вафот этди.
Ўзбек илм-фани, хусусан кимё соҳаси ўзига хос ривожланиш тарихига эга. Ўтган асрда ўзбек кимёгарлари йирик илмий ва маданий манбаларни яратди. Собиржон Аминов ҳам шундай олимлардан. Асли мутахассислиги фармацевт бўлган Собиржон Аминов 1938 йил 2 августда Тошкентда дунёга келган.
Меҳнат фаолиятини Ўзбекистон Фанлар aкадемияси Гидроингео ва муҳандислик геологияси институтида бошлаган олим, 1962—1965 йилларда собиқ СССР ФА Элементорганик бирикмалар институтида аспирантурада ўқиб, «Этиленнинг карбон кислоталари ва уларнинг ҳосилалари билан теломеризацияси. Теломирезация жараёнида эркин радикалларнинг қайта тақсимланиши» мавзусида номзодлик диссертациясини мувафақиятли ҳимоя қилди. Олим изланишлари натижасида кичик молекулали карбон кислоталар ва уларнинг ҳосилаларининг этилен билан теломирезациясини ўрганиб, тармоқланган юқори молекулали карбон кислоталар олишга муваффақ бўлди. Унинг кашфиёти радикалларнинг қайта тақсимланиши янги реакция деб эътироф этилди ва саноат миқёсида жорий этилди.
Бир неча йиллик машаққатли илмий изланишлар натижасида Менделеев номидаги Россия Кимё-технология университетида «Карбон, фосфон, алкиларилсулфкислоталарнинг сирт фаол ҳосилаларининг синтези ва коллоид кимёвий хоссалари» мавзусида докторлик диссертациясини мувафақиятли ҳимоя қилиб, фан доктори илмий даражасига сазовор бўлди.
Собиржон Аминов Тошкентга қайтгандан сўнг, Ўзбекистон Фанлар fкадемияси Умумий ва ноорганик кимё институтида сирт фаол моддалар синтези ва уларнинг коллоид кимёвий хоссаларини ўрганиш йўналишида тадқиқотлар олиб борди. У илк бор сирт фаол моддаларнинг коллоид кимёвий хоссаларини ва турли аспектларда қўллаш усулларини текширди. Унинг мазкур масаладаги ўрганишлари натижаси ипакчилик хўжаликларида, Тошкент ювувчи воситалар заводида ва бошқа корхоналарда ишлаб чиқаришга жорий этилди.
Собиржон Нигматович 1978 йил ўзининг алма-матери — Тошкент фармацевтика институтига қайтди. Олим вафотига қадар табиий ва синтетик табиатли кимёвий бирикмаларни фармацияда қўллаш, улар асосида янги дори воситалар ишлаб чиқиш йўналишида кенг кўламли илмий тадқиқотлар олиб борди. Тажрибали профессор мустақиллик йилларида маҳаллий хом ашёлар асосида дори воситалари ишлаб чиқариш йўналишида чуқур изланишлар олиб борди. ТошФарМИ олимлари билан биргаликда мўмиёни тозалаш, олинган субстанцияни стандартлаш ҳамда у асосида капсула дори шаклини ишлаб чиқди. Бу изланишлар Remedy Group қўшма корхонасида жорий этилди. Унинг бошчилигидаги изланишлар натижасида ишлаб чиқилган дори воситалари — «Навбахтит», «Гликоинувит», «Аллтромбосепин», «Гликоразмулин», «Диабенит»,«Спекгарлин» «Мекритин» саноат миқёсида ўзлаштирилган.
Собиржон Аминовнинг ихтиролари республикамизнинг долзарб муаммолари ечимига қаратилганлиги билан аҳамиятлидир, жумладан, унинг ишланмалари «Янги интеллект» республика танловида икки марта иккинчи ўринни қўлга киритган.
Собиржон Нигматович талабчан, фидойи, жонкуяр ва меҳрибон устоз сифатида ҳамкасблари орасида ном қозонган. У фаолияти давомида кўплаб новатор ёшларни талабалик давридан саралаб олиб, улар билан астойдил ишлаб фан номзоди ёки фан доктори даражасига олиб чиққан. Унинг раҳбарлигида олтита докторлик, 17 та номзодлик ва 10 та магистрлик диссертацияси муваффақиятли ҳимоя қилинган. Шунингдек, олимнинг беш нафар иқтидорли шогирдлари Республика кимё фан олимпидаси ва нуфузли танловларда фахрли ўринларни қўлга киритган. Унинг шогирдлари орасида бир нафар Президент стипендияси ва олти нафар «Ибн Сино» стипендияси совриндорлари борлиги унинг республикада кадрлар тайёрлашдаги хизматлари беқиёс эканлигини кўрсатади.
Собиржон Нигматович шогирдларини олға бошлаш ва юқори натижаларни қўлга киритишлари учун доим руҳий жиҳатдан қўллаб-қуватлаб турарди. Унинг кўп марта такрорлайдиган: «Ортда қолиш — бу тўхтаб қолиш демакдир», деган сўзлари барча шогирдлари қалбидан чуқур жой эгаллаган.
Собиржон Аминов «Физик ва коллоид кимё», «Умумий ва анорганик кимёдан амалий машғулотлар», «Физик ва коллоид кимёдан амалий машғулотлар», «Физик ва коллоид кимёдан масалалар тўплами», «Анорганик кимё», «Ноорганик кимё» каби дарсликларнинг ва қўлланмалар муаллифи. Унинг дарслик ва қўлланмалари икки маротаба «Йилнинг энг яхши дарслиги ва ўқув адабиёти» танловининг ғолиби деб топилган. Фаолияти давомида олим 80 та ихтиро патенти ва муаллифлик гувоҳномалари олган, шунингдек, Собиржон Аминов 600 дан ортиқ илмий иш, 20 та фармакопея мақолалари, 5 та монография ва 10 та дасрлик ҳамда ўқув қўлланмалар муаллифидир.
Унинг илмий изланишлари Россия, Украина, Белaрусь, Қозоғистон, Австрия, Исроил, Германия, Испания ва Туркия каби давлатларда муҳокама қилинган.
2007 йилда Собиржон Аминовнинг меҳнатлари эътироф этилиб, «Ўзбекистон фан арбоби» унвони билан мукофотланган.
Собиржон Нигматович муҳаррирлик илмини ҳам пухта ўзлаштирган олимлардан эди. У 1992 йилдан то вафотига қадар «Фармацевтика журнали» (аввалги «Кимё ва фармация» журнали) бош муҳаррири ўринбосари сифатида фаолият олиб борди, журналнинг Ўзбекистондаги ва халқаро нуфузини оширишга ҳиссасини қўшди.
Ўзбек илмининг фидойи олими, кимёгар, фармацевт, ихтирочи, маҳоратли устоз сифатида Собиржон Аминовнинг тажрибалари ёш олимлар учун катта илмий мактабдир. Профессорнинг ёрқин хотираси Тошкент фармацевтика институти жамоаси, фарзандлари, ҳамкасблари, шогирдлари қалбида абадий сақланади.
Ҳумоюн Аминов (невараси), Авез Шарипов, фарм.ф.д. (шогирди)
Изоҳ (0)