Сўнгги бир неча кундан буён ижтимоий тармоқларда ҳудудлардаги СЭСларда тест топшириш ва унинг натижасини билишда турли муаммолар юзага келаётгани кенг муҳокама қилинмоқда. Соғлиқни сақлаш вазирининг биринчи ўринбосари – Санитария-эпидемиологик осойишталик агентлиги директори Баҳодир Юсуфалиев 12 июль куни «Ўзбекистон 24» телеканалига берган интервьюсида тармоқ фойдаланувчиларининг танқидларига ўз муносабатини билдирди.
«Ҳақиқатан, бугунги кунда соғлиқни сақлаш тизимига ‘нагрузка’ жуда юқори бўлмоқда. Сабаби кунига 450-470 нафар бемор аниқланмоқда.
Иккинчидан, чет элдан фуқароларимиз келишда давом этмоқда, уларни қабул қилишимиз керак. Давлат раҳбари бу масалага алоҳида эътибор қаратган. Чартер рейслар орқали хориждан келганлар карантин зоналарига жойлаштирилгач, уларда, албатта, тестларни ўтказамиз. Шифохоналарда даволанаётган беморлардан ҳам бир неча марта тест оламиз. Ҳозирда махсус шифохоналарда беш мингга яқин бемор даволанмоқда.
Республика бўйича кунига 20, 22, 25 минггача тестлар ўтказяпмиз. Авваллари кунига 8-10 мингта тест ўтказган бўлсак, ҳозирга келиб бу кўрсаткич 2-3 баробарга ошди. Бу ҳам соғлиқни сақлаш тизимига катта «нагрузка» бўляпти. Ушбу натижага эришиш учун қўшимча 45 та ПЗР лабораториялари сотиб олинди ва жойларга етказилди.
Ҳозир Ўзбекистонда тестлар етарли эмаслиги ҳақида ҳар хил гаплар юрибди. Тестлар бор. Захирамизда 1 миллионта тест мавжуд ва бу жараён давом этади. Захира тез-тез янгиланиб борилади. Соғлиқни сақлаш тизими, агентлик бу борада ишларни ташкил қиляпти.
Тўғри, айрим муаммолар бўлиши мумкин. Камчиликлар йўқ эмас. Мисол учун, Тошкент шаҳрининг ўзида 5 та жойда тест синовларини олиш масаласи қўйилган эди. Лекин бугунги кунда касалланиш ҳолатлари ўсишини инобатга олиб биз ҳозир ҳар битта туманнинг ўзида тестларни олиш масаласини қўйганмиз ва бу ишлар амалга ошириляпти», — деди Баҳодир Юсуфалиев.
Вазир ўринбосарининг таъкидлашича, айни пайтда шифохоналарда барча шарт-шароитлар яратилган бўлиб, дорихоналарда ҳам дорилар етарлича.
«Бугунги кунда шифохоналаримизда ўрин заҳиралари мавжуд. Сунъий нафас олдириш аппаратлари, ЭКГ каби тиббий буюмлар етарли миқдорда харид қилинган. Мазкур буюмлар Зангиота тумани ва Тошкент шаҳрида қурилган янги шифохоналарга жойлаштирилган. Ҳозирда республикада фаолият кўрсатаётган бошқа шифохоналарда ҳам беморлар учун етарли шароитлар яратиб бериляпти. Бундан ташқари, ‘Дори-дармон’ аксионерлик компанияси ва бошқа компаниялар орқали дори-дармон захираси ҳам яратиб бориляпти. Дорихоналарда мавжуд дорилар бор. Аҳоли уларни кўп миқдорда олиши шарт эмас. Керакли пайтда харид қилишса бўлади», — деди Юсуфалиев.
Изоҳ (0)